Tags : russia

ମସ୍କୋ: ଭାରତକୁ ଅତ୍ୟାଧୁନିକ ପଞ୍ଚମ ପିଢ଼ିର ଷ୍ଟେଲଥ୍ ଯୁଦ୍ଧବିମାନ ‘ଏସ୍‌ୟୁ-୫୭’ (ସୁଖୋଇ-୫୭) ଯୋଗାଇ ଦେବାକୁ ରୁଷ୍ ପ୍ରସ୍ତାବ ଦେଇଛି। ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି ଆମେ କୌଣସି ପ୍ରତିବନ୍ଧକ କିମ୍ବା ସୀମା ନରଖି ଭାରତ ସହିତ ମିଳିତ ଭାବେ ‘ଏସ୍‌ୟୁ-୫୭’ ଯୁଦ୍ଧବିମାନର ବିକାଶ ଓ ଉତ୍ପାଦନ କରିବାକୁ ପ୍ରସ୍ତୁତ। ସେ କହିଛନ୍ତି ଯେ ଭାରତକୁ ଏହି ଯୁଦ୍ଧବିମାନର ପ୍ରଯୁକ୍ତିବିଦ୍ୟା ହସ୍ତାନ୍ତର ଏବଂ ବିକାଶ କ୍ଷେତ୍ରରେ ରୁଷ କୌଣସି କଟକଣା ରଖିବ ନାହିଁ। ଏହା ପାଶ୍ଚାତ୍ୟ ଦେଶଗୁଡ଼ିକ ଉପରେ ଏକ ପରୋକ୍ଷ କଟାକ୍ଷ ଯେଉଁମାନେ କି ପ୍ରଯୁକ୍ତିବିଦ୍ୟା ଦେବା ସମୟରେ ଅନେକ ସର୍ତ୍ତ ରଖିଥାନ୍ତି।ପୁଟିନ ମନେ ପକାଇ ଦେଇଛନ୍ତି ଯେ ରୁଷ ପ୍ରଥମେ ଏହି ପ୍ରକଳ୍ପ ଭାରତ ସହ ମିଳିତ ଭାବେ ଆରମ୍ଭ କରିବାକୁ ଚାହୁଁଥିଲା; କିନ୍ତୁ ସେତେବେଳେ ଭାରତ କହିଥିଲା ଆପଣ (ରୁଷ) ନିଜେ ଏହାକୁ ପ୍ରସ୍ତୁତ କରନ୍ତୁ, ପରେ ଆମେ ଦେଖିବା। ଏହାପରେ ରୁଷ ନିଜେ ଏହାକୁ ବିକଶିତ କଲା। କିନ୍ତୁ ରୁଷ ଏବେ ଏହି ପ୍ରଯୁକ୍ତିବିଦ୍ୟା ଭାରତକୁ ଦେବାକୁ ପ୍ରସ୍ତୁତ। ପୁଟିନଙ୍କ ମତରେ ଏସ୍‌ୟୁ-୫୭ ବର୍ତ୍ତମାନ ସୁଦ୍ଧା ବିଶ୍ୱର ସର୍ବଶ୍ରେଷ୍ଠ ଯୁଦ୍ଧବିମାନ। ଏହା ଶତ୍ରୁର ରାଡାରକୁ ଚକମା ଦେବାରେ ଏବଂ ଆକାଶରୁ ଆକାଶ, ଭୂପୃଷ୍ଠ ତଥା ସମୁଦ୍ରରେ ଥିବା ଲକ୍ଷ୍ୟଭେଦ କରିବାରେ ଅତ୍ୟନ୍ତ ଶକ୍ତିଶାଳୀ। ବର୍ତ୍ତମାନ ଭାରତୀୟ ବାୟୁସେନା ପାଖରେ କୌଣସି ପଞ୍ଚମ ପିଢ଼ିର ଷ୍ଟେଲଥ୍ (ଦୃଶ୍ୟମାନ ହେଉ ନଥିବା) ଯୁଦ୍ଧବିମାନ ନାହିଁ। ଅପରପକ୍ଷରେ ଚୀନ୍ ପାଖରେ ଜେ-୨୦ ରହିଛି ଏବଂ ପାକିସ୍ତାନ ମଧ୍ୟ ଚୀନ୍‌ଠାରୁ ଜେ-୩୫ ଷ୍ଟେଲଥ୍ ଯୁଦ୍ଧବିମାନ ଆଣିବାକୁ ଯୋଜନା କରୁଛି।
ଭାରତ ନିଜର ଦେଶୀ ପଞ୍ଚମ ପିଢ଼ିର ଯୁଦ୍ଧବିମାନ ତିଆରି ଉପରେ କାମ କରୁଛି; କିନ୍ତୁ ଏହା ବାୟୁସେନାରେ ସାମିଲ ହେବାକୁ ପ୍ରାୟ ୨୦୩୫ ମସିହା ହୋଇଯାଇପାରେ। ଏହି ସମୟ ମଧ୍ୟରେ ସୁରକ୍ଷା ବ୍ୟବଧାନକୁ ପୂରଣ କରିବା ପାଇଁ ଭାରତ ରୁଷରୁ ପ୍ରାୟ ୩୬ଟି (୨ଟି ସ୍କ୍ୱାଡ୍ରନ) ଏସ୍‌ୟୁ-୫୭ କିଣିବା ବିଷୟରେ ଚିନ୍ତା କରିପାରେ। ଭାରତର ସରକାରୀ ପ୍ରତିରକ୍ଷା ସଂସ୍ଥା ହାଲ୍‌ ବର୍ତ୍ତମାନ ସୁଖୋଇ ଡିଜାଇନ୍ ବ୍ୟୁରୋ ସହିତ ଯୋଗାଯୋଗ ପୂର୍ବକ ଏହି ଯୁଦ୍ଧବିମାନକୁ ମିଳିତ ଭାବେ ତିଆରି କରିବାକୁ ଯୋଜନା ଚଳାଇଛି।