Tags : punam gupta

ନୂଆଦିଲ୍ଲୀ: ଡ. ପୁନମ ଗୁପ୍ତା ରିଜର୍ଭ ବ୍ୟାଙ୍କ ଅଫ ଇଣ୍ଡିଆ (ଆରବିଆଇ) ର ନୂଆ ଡେପୁଟି ଗଭର୍ଣ୍ଣର ଭାବେ ନିଯୁକ୍ତି ହୋଇଛନ୍ତି । ସେ ତିନି ବର୍ଷ ଲାଗି ଏହି ପଦବୀରେ କାର୍ଯ୍ୟ କରିବେ । ଏହା ପୂର୍ବରୁ ସେ ପ୍ରଧାନମନ୍ତ୍ରୀଙ୍କ ଆର୍ଥିକ ପରାମର୍ଶଦାତା ପରିଷଦରେ ସଦସ୍ୟ ଭାବେ ଅବସ୍ଥାପିତ ଥିଲେ । ଜାନୁଆରୀରେ ଇସ୍ତଫା ଦେଇଥିବା ଡେପୁଟି ଗଭର୍ଣ୍ଣର ମାଇକେଲ ପାତ୍ରଙ୍କ ସ୍ଥାନରେ ଏବେ ଶ୍ରୀମତି ଗୁପ୍ତାଙ୍କୁ ନିଯୁକ୍ତି ଦେଇଛନ୍ତି କେନ୍ଦ୍ର ସରକାର । କେନ୍ଦ୍ର କ୍ୟାବିନେଟର ନିଯୁକ୍ତି କମିଟି ତାଙ୍କ ନିଯୁକ୍ତିକୁ ମଞ୍ଜୁରି ପ୍ରଦାନ କରିଛନ୍ତି । ୫ ଏପ୍ରିଲରେ ଅନୁଷ୍ଠିତ ହେବାକୁ ଥିବା ଆରବିଆଇର ମୁଦ୍ରାନୀତି କମିଟି (ଏମପିସି) ବୈଠକ ପୂର୍ବରୁ ଶ୍ରୀମତି ଗୁପ୍ତାଙ୍କୁ ନିଯୁକ୍ତି ଦିଆଯାଇଛି । ୨୦୨୧ରୁ ଶ୍ରୀମତି ଗୁପ୍ତା ନ୍ୟାସନାଲ କାଉନସିଲ ଅଫ ଆପ୍ଲାଏଡ ଇକୋନୋମିକ୍ସ ରିସର୍ଚ୍ଚ (ଏନସିଏଇଆର)ର ମହାନିଦେ୍ର୍ଧଶକ ଏବଂ ୧୬ତମ ଅର୍ଥ ଆୟୋଗର ସଦସ୍ୟ ରହିଛନ୍ତି । ଏହା ପୂର୍ବରୁ ସେ ନୀତି ଆୟୋଗର ବିକାଶ ପରାମର୍ଶଦାତା କମିଟି ଏବଂ ୟୁଏସଏ ମେରିଲାଣ୍ଡ ୟୁନିଭର୍ସିଟିରୁ ଅର୍ଥନୀତିରେ ପିଏଚଡି କରିଛନ୍ତି । ଆଇଏମଏଫ ଏବଂ ୱାର୍ଲଡ ବ୍ୟାଙ୍କ ଭଳି ଆନ୍ତର୍ଜାତୀୟ ଅନୁଷ୍ଠାନ ସହ କାମ କରିବାରେ ତାଙ୍କର ଦୀର୍ଘ ୨୦ ବର୍ଷର ଅଭିଜ୍ଞତା ରହିଛି । ବିଶ୍ୱ ବ୍ୟାଙ୍କର ପରାମର୍ଶଦାତା ପରିଷଦରେ ସେ ସଦସ୍ୟ ଭାବେ କାର୍ଯ୍ୟ କରିଛନ୍ତି । ସେହିଭଳି ଜି ୨୦ ପ୍ରେସିଡେନ୍ସିରେ ମାଇକ୍ରୋ ଇକୋନୋମିକ୍ସି ଟାକ୍ସ ଫୋର୍ସର ଅଧ୍ୟକ୍ଷ ଭାବେ ଶ୍ରୀମତି ଗୁପ୍ତା କାର୍ଯ୍ୟ କରିଥିଲେ ।