Apr 4, 2025
ମୁଖ୍ୟ ଖବର
ଭୁବନେଶ୍ୱର: ଯୁବତୀ ହେଉ କି ମହିଳା, ରାଜଧାନୀ ଭୁବନେଶ୍ୱର ସେମାନଙ୍କ ପାଇଁ ଅସୁରକ୍ଷିତ । ସରକାରୀ ତଥ୍ୟ କହୁଛି ଜାତୀୟ ରାଜପଥ, ରାଜ୍ୟ ରାଜପଥ ଓ ଅନ୍ୟ ରାସ୍ତାରେ ଗତ ୪ବର୍ଷ ଭିତରେ ୧୩୧୪ ଜଣ ଅସଦାଚରଣର ଶିକାର ହୋଇଛନ୍ତି । ରାଜ୍ୟରେ କୌଣସି ପୁଲିସ ଜିଲ୍ଲାରେ ଅସଦାଚରଣ ସଂଖ୍ୟା ୫୦୦ ଟପି ନଥିବା ବେଳେ ରାଜଧାନୀ ସର୍ବକାଳୀନ ରେକର୍ଡ କରିଛି । ସରକାରୀ ତଥ୍ୟ କହୁଛି ଗତ ୪ବର୍ଷ ମଧ୍ୟରେ ରାଜ୍ୟରେ ୫୬୬୮ଟି ଅସଦାଚରଣ ମାମଲା ବିଭିନ୍ନ ଥାନାରେ ରୁଜୁ ହୋଇଛି । ଏ ସବୁ ଘଟଣା ଘଟିଛି ଜାତୀୟ ରାଜପଥ, ରାଜ୍ୟ ରାଜପଥ ଓ ଅନ୍ୟାନ୍ୟ ରାସ୍ତାରେ । ପ୍ରଥମ ସ୍ଥାନରେ ରହିଛି କମିଶନରେଟ୍ ପୁଲିସ ଭୁବନେଶ୍ୱର ୟୁପିଡି । ଏଠାରେ ୧୩୧୪ ଜଣ ଅସଦାଚରଣ ଶିକାର ହୋଇ ମିଭିନ୍ନ ଥାନାରେ ଅଭିଯୋଗ କରିଛନ୍ତି । କମିଶନରେଟ୍ ପୁଲିସ କଟକ ୟୁପିଡିରେ ଗତ ୪ବର୍ଷରେ ମାତ୍ର ୯ଟି ମାମଲା ରୁଜୁ ହୋଇଛି । ଦ୍ୱିତୀୟରେ ରହିଛି ସମ୍ବଲପୁର ପୁଲିସ୍ ଜିଲ୍ଲା । ଏଠି ୪୫୩ଜଣ ଅସଦାଚରଣ ଶିକାର ହୋଇଛନ୍ତି । ତୃତୀୟରେ ରହିଛି ନୂଆପଡା ଜିଲ୍ଲା । ଏହି ଜିଲ୍ଲାରେ ୩୧୦ଟି ଅସଦାଚରଣ ମାମଲା ପୁଲିସ ରୁଜୁ କରିଛି । ଭଦ୍ରକରେ ୨୪୦ଟି ଅସଦାଚରଣ, ପୁରୀରେ ୧୧୯ଟି,ବାଲେଶ୍ୱରରେ ୮୧ଟି, ଅନୁଗୁଳରେ ୧୦୭ଟି, ବରଗଡରେ ୪୯ଟି, ବଲାଙ୍ଗିରରେ ୨୮ଟି, ଦେବଗଡରେ୧୯ଟି, ରାୟଗଡରେ୧୮ଟି, ବୌଦ୍ଧ, ଜଗତସିଂହପୁର, ନୟାଗଡ ଓ ମୟୁରଭଞ୍ଜରେ ୧ଟି ଲେଖାଏଁ ଅସଦାଚରଣ ଘଟିଛି । କଟକ ଗ୍ରାମାଞ୍ଚଳ ପୁଲିସ ଜିଲ୍ଲା, ଯାଜପୁର, କେଦ୍ରାପଡା, ଖୋର୍ଦ୍ଧା, ଝାରସୁଗୁଡା, ସୋନପୁର, ଢେ଼ଙ୍କାନାଳ, ଗଞ୍ଜାମ ପୁଲିସ ଜିଲ୍ଲା, ଗଜପତି, ବ୍ରହ୍ମପୁର ପୁଲିସ , କନ୍ଧମାଳ, କୋରାପୁଟ, ନବରଙ୍ଗପୁର, ମାଲକାନଗିରି, କଳାହାଣ୍ଡି, ସୁନ୍ଦରଗଡ ପୁଳିସ, କେନ୍ଦୁଝର ଓ ରାଉଲକେଲା ପୁଲିସ୍ ଜିଲ୍ଲାରେ ଗତ ୪ବର୍ଷ ମଧ୍ୟରେ ରାସ୍ତା ଉପରେ ଜଣେ ହେଲେ ବି ଅସଦାଚରଣ ଶିକାର ହୋଇ ନଥିବା ରିପୋର୍ଟ କହୁଛି । ଖାଲି ଅସଦାଚରଣ ନୁହେଁ,ରାସ୍ତା ଘାଟରେ ଡକାୟତି ଓ ଲୁଟରେ ସବୁ ପୁଲିସ ଜିଲ୍ଲାକୁ ପଛରେ ପକାଇ ପ୍ରଥମ ସ୍ଥାନ ଗ୍ରହଣ କରିଛି କମିଶନରେଟ୍ ପୁଲିସ୍ ଭୁବନେଶ୍ୱର । ଗତ ୪ବର୍ଷ ମଧ୍ୟରେ ରାଜ୍ୟରେ ଜାତୀୟ ରାଜପଥ, ରାଜ୍ୟ ରାଜପଥ ଓ ଅନ୍ୟ ରାସ୍ତାରେ ୫୬୬୮ଟି ଲୁଟ୍ ହୋଇଛି । ସର୍ବାଧିକ ୧୬୧୫ଟି ଲୁଟ୍ ଭୁବନେଶ୍ୱର ବିଭିନ୍ନ ରାସ୍ତାରେ ହୋଇଛି । ଚୋର ଧରିବା ଓ ସମ୍ପତ୍ତି ଜବତ କରିବାରେ କମିଶନରେଟ୍ ପୁଲିସ ଫେଲ୍ ମାରିଛି । କଟକ କମିଶନରେଟ୍ ପୁଲିସ୍ ଅଞ୍ଚଳରେ ମାତ୍ର ୧୪୧ଟି ଲୁଟ୍ ହୋଇ ଥିବା ଜଣାପଡିଛି । ଦ୍ୱିତୀୟରେ ରହିଛି ଭଦ୍ରକ ଜିଲ୍ଲା । ଏହି ଜିଲ୍ଲାରେ ୫୪୬ଟି ଲୁଟ୍ ହୋଇଥିବା ଅଭିଯୋଗ ହୋଇଛି । ତୃତୀୟରେ ପୁରୀ ଜିଲ୍ଲାରେ ୫୪୦ଟି ଲୁଟ୍ ହୋଇଥିଲା । ସମ୍ବଲପୁର ୪୩୮ଟି ଲୁଟ୍, ବାଲେଶ୍ୱରରେ ୪୨୯ଟି, ବଲାଙ୍ଗିରରେ ୨୭୪ଟି ଲୁଟ୍ ଓ କୋରାପୁଟ୍ରେ ୧୦୧ଟି ଘଟଣା ଘଟିଥିବା ରିପୋର୍ଟ କହୁଛି । ବ୍ରହ୍ମପୁର ପୁଲିସ୍ ଜିଲ୍ଲା, କନ୍ଧମାଳ, ନବରଙ୍ଗପୁର, ମାଲକାନଗିରି, ନୂଆପଡା ଜିଲ୍ଲାରେ ରାସ୍ତାଘାଟରେ ଗୋଟିଏ ହେଲେ ବି ଲୁଟ ଘଟି ନଥିବା ସରକାରଙ୍କ ତଥ୍ୟ କହୁଛି । ସେହିଭଳି ଗତ ୪ବର୍ଷ ମଧ୍ୟରେ ରାଜ୍ୟର ବିଭିନ୍ନ ରାସ୍ତାରେ ୯୨୪ଟି ସଶସ୍ତ୍ର ଡକାୟତ ଘଟିଛି । ଦିନ ମେଳେ ୩୮୨ଟି ଡକାୟତି ହୋଇଥିବା
ବେଳେ ରାତିରେ ୫୪୨ଟି ମାମଲା ବିଭିନ୍ନ ଥାନାରେ ମାମଲା ରୁଜୁ ହୋଇଛି । ଦିନ ବେଳେ ରାସ୍ତାରେ ୪୧ଟି ଡକାୟତି ଘଟି ପ୍ରଥମ ସ୍ଥାନ ଗ୍ରହଣ କରିଛି ବାଲେଶ୍ୱର ଜିଲ୍ଲା । ରାତିବେଳେ ବାଲେଶ୍ୱରରେ ୫୧ଟି ଡକାୟତି ହୋଇଛି । ଭୁବନେଶ୍ୱର ୟୁପିଡିରେ ଦିନରେ ୩୦ଟି ଓ ରାତି ବେଳା ୯୧ଟି ଡକାୟତି ହୋଇଥିବା ବିଭିନ୍ନ ଥାନାରେ ମାମଲା ରୁଜୁ ହୋଇଛି । କଟକ କମିଶନରେଟ୍ ପୁଲିସ୍ରେ ଦିନରେ ୨୨ଟି ଓ ରାତିରେ ୧୩ଟି ଡକାୟତି ହୋଇଛି । ପୁରୀରେ ଦିନରେ ୧୫ଟି ରାତିରେ ୩୬ଟି, କଟକ ଗ୍ରମାଞ୍ଚଳରେ ଦିନରେ ୩ଟି ରାତିରେ ୭ଟି, ଖୋର୍ଦ୍ଧାରେ ଦିନରେ ୧୦ଟି ରାତିରେ ୧୭ଟି, ଭଦ୍ରକରେ ଦିନରେ ୨. ରାତିରେ ୧୧ଟି, ସମ୍ବଲପୁରରେ ଦିନରେ ୧୮ଟି ରାତିରେ ୩୩ଟି, ବଲାଙ୍ଗିରରେ ଦିନରେ ୩୬ଟି ରାତିରେ ୪୨ଟି,କୋରାପୁଟରେ ଦିନରେ ୨୩ଟି ରାତିରେ ୧୯ଟି, ବୌଦ୍ଧରେ ଦିନରେ ୧୩ଟି ରାତିରେ ୧୫ଟି, ନବରଙ୍ଗପୁରରେ ଦିନରେ ୧୧ଟି ଓ ରାତିରେ ୧୬ଟି ଡକାୟତି ଡକାୟତି ହୋଇଥିଲା । ନୟାଗଡ଼,ଗଜପତି, ବ୍ରହ୍ମପୁରରେ ଦିନ କି ରାତିରେ ଗୋଟିଏ ହେଲେ ବି ଡକାୟତି ମାମଲା ରୁଜୁ ହୋଇ ନଥିବା ସରକାରଙ୍କ ତଥ୍ୟ କହୁଛି ।
Comments ସମସ୍ତ ମତାମତ