Tags : delimitation meeting

ଚେନ୍ନାଇ: ସୀମା ପୁନଃ ନିର୍ଦ୍ଧାରଣ ପ୍ରସଙ୍ଗକୁ ନେଇ ଏକଜୁଟ୍ ହୋଇଛନ୍ତି ବିରୋଧୀ  । ତାମିଲନାଡୁ ମୁଖ୍ୟମନ୍ତ୍ରୀ  ଏମ.କେ.ଷ୍ଟାଲିନ୍ଙ୍କ ଆହ୍ୱାନରେ ଚେନ୍ନାଇ ବୈଠକରେ ଏନଡିଏ ବିରୋଧୀ ଏକଜୁଟ୍ ହୋଇ ସୀମା ପୁନଃ ନିର୍ଦ୍ଧାରଣ ପ୍ରସଙ୍ଗକୁ ନେଇ ଉଦ୍ବେଗ ପ୍ରକାଶ କରିଛନ୍ତି  । ଜନସଂଖ୍ୟା ନିୟନ୍ତ୍ରଣ କରିଥିବା ରାଜ୍ୟ ଉପରେ ଏହାର ପ୍ରତିକୂଳ ପ୍ରଭାବ ପଡ଼ିବ ବୋଲି ଆଶଙ୍କା ବ୍ୟକ୍ତ କରିଛନ୍ତି  । ସ୍ୱଛ ଓ ନିରପେକ୍ଷ ସୀମା ନିର୍ଦ୍ଧାରଣ ପାଇଁ ବିରୋଧୀ ବୈଠକରେ ଆହ୍ୱାନ ଦେଇଛନ୍ତି  । ସବୁ ପ୍ରସଙ୍ଗରେ ଏନଡିଏ ଓ ଇଣ୍ଡିମେଣ୍ଟଠାରୁ ସମଦୂରତା ଅବଲମ୍ବନ କରିଆସୁଥିବା ବିଜୁ ଜନତା ଦଳ ପ୍ରଥମ ଥର ପାଇଁ ସୀମା ପୁନଃ ନିର୍ଦ୍ଧାରଣ ପ୍ରସଙ୍ଗରେ ଏନଡିଏ ବିରୋଧୀ ବୈଠକରେ  ସାମିଲ ହୋଇ ସମର୍ଥନ ଘୋଷଣା କରିଛି  । ବୈଠକରେ ବିଜୁ ଜନତା ଦଳର ପ୍ରତିନିଧି ଯୋଗ ଦେଇଥିବା ବେଳେ ଦଳର ସଭାପତି ନବୀନ ପଟ୍ଟନାୟକ ଭିଡିଓ ବାର୍ତ୍ତା ଜରିଆରେ ସମର୍ଥନ ଘୋଷଣା କରିବା ସହ ଏହାକୁ ନେଇ ଉଦ୍ବେଗ ପ୍ରକାଶ କରିଛନ୍ତି  ।
 ସୀମା ନିର୍ଦ୍ଧାରଣ ପ୍ରସଙ୍ଗ ନେଇ ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ ଶନିବାର ଚେନ୍ନାଇରେ ବିରୋଧୀ ନେତାମାନଙ୍କର ଏକ ବୈଠକ ଡାକିଥିଲେ । ବୈଠକରେ କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନ, ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ, ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ ଏବଂ କର୍ଣ୍ଣାଟକ ଉପମୁଖ୍ୟମନ୍ତ୍ରୀ ଡିକେ ଶିବକୁମାର ଏଥିରେ ଅଂଶଗ୍ରହଣ କରିଥିଲେ । ଏହା ସହ ଅନେକ ରାଜ୍ୟର ବିରୋଧୀ ନେତା ବୈଠକରେ ଯୋଗ ଦେଇଥିଲେ । ବୈଠକରେ ତାମିଲନାଡୁ ମୁଖ୍ୟମନ୍ତ୍ରୀ ଷ୍ଟାଲିନ ସ୍ପଷ୍ଟ କରିଥିଲେ ଯେ ବିରୋଧୀ ସୀମା ନିର୍ଦ୍ଧାରଣ ବିରୋଧରେ ନୁହେଁ ବରଂ ଏକ ଅନୁଚିତ ସୂତ୍ରର ବିରୋଧୀ ଯାହା ଜନସଂଖ୍ୟା ବୃଦ୍ଧିକୁ ସଫଳତାର ସହିତ ନିୟନ୍ତ୍ରଣ କରିଥିବା ରାଜ୍ୟଗୁଡ଼ିକୁ ପ୍ରତିକୂଳ ଭାବରେ ପ୍ରଭାବିତ କରିବ । ଦରକାର ପଡିଲେ ଏହି ପ୍ରକ୍ରିୟାକୁ ଚ୍ୟାଲେଞ୍ଜ କରିବା ପାଇଁ ଆଇନଗତ ବିଶେଷଜ୍ଞ କମିଟି ମଧ୍ୟ ଗଠନ କରିବୁ । ଆମର ଅଧିକାର ପାଇଁ ନିୟମିତ କାର୍ଯ୍ୟକ୍ରମର ଆବଶ୍ୟକତା ରହିଛି । ଆମ ପ୍ରତିନିଧିତ୍ୱ କେବେ ହେଲେ ହ୍ରାସ ପାଇପାରିବ ନାହିଁ ।  ଆଗାମୀ ସୀମା ନିର୍ଦ୍ଧାରଣ ଯୋଗୁଁ ଦକ୍ଷିଣ ଭାରତୀୟ ରାଜ୍ୟ ସଂସଦୀୟ ଆସନ ହରାଇବ ନାହିଁ ବୋଲି କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହଙ୍କ ପ୍ରତିଶ୍ରୁତି ଉପରେ ସନେ୍ଦହ ପ୍ରକାଶ କରିଥିଲେ ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ । ଷ୍ଟାଲିନ କହିଥିଲେ ଯେ ସେ ଅମିତ ଶାହଙ୍କ କଥାକୁ ବିଶ୍ୱାସ କରନ୍ତି ନାହିଁ ।
ସେହିପରି କେରଳ ମୁଖ୍ୟମନ୍ତ୍ରୀ ପିନରାୟୀ ବିଜୟନ ତାଙ୍କ ଅଭିଭାଷଣରେ ସୀମା ପୁନଃ ନିର୍ଦ୍ଧାରଣକୁ ଦକ୍ଷିଣପୂର୍ବ ରାଜ୍ୟଗୁଡିକ ଉପରେ ବିପଦର ଖଣ୍ଡା ଝୁଲିବା ସହ ଲିଙ୍କ କରିଛନ୍ତି । ସଂକୀର୍ଣ୍ଣ ରାଜନୀତିକ ସ୍ୱାର୍ଥ ପାଇଁ ବିଜେପି ଏପରି କରିବାକୁ ଚାହୁଁଛି । ଏପରି ହଠାତ୍ ପଦକ୍ଷେପ ସାମ୍ବିଧାନିକ ନୀତି କିମ୍ବା ଗଣତାନ୍ତ୍ରିକ ମୂଲ୍ୟବୋଧ ଦ୍ୱାରା ଆୌ ଗ୍ରହଣୀୟ ନୁହେଁ ବୋଲି ବିଜୟନ କହିଛନ୍ତି ।
କର୍ଣ୍ଣାଟକ ଉପମୁଖ୍ୟମନ୍ତ୍ରୀ ଶିବକୁମାର କହିଛନ୍ତି, ଦକ୍ଷିଣ ପ୍ରାନ୍ତର ରାଜ୍ୟଗୁଡିକ ଜାତୀୟ ସ୍ୱାର୍ଥ ପାଇଁ ଜନସଂଖ୍ୟା ନିୟନ୍ତ୍ରଣ ଓ ସ୍ୱାକ୍ଷରତାକୁ ଗୁରୁତ୍ୱ ଦେଇ ଆସିଛନ୍ତି । ଆମେ କେବେ ହେଲେ ଆମ ସିଟ୍ଗୁଡିକୁ କମ ହେବାକୁ ଦେବୁନି । ଆମେ ଆର୍ଥିକ ଓ ସ୍ୱାକ୍ଷରତା ବର୍ଗରେ ଆମେ ଆଗରେ ରହି ଆସିଛୁ ।”
ତେଲଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ଅଭିଯୋଗ କରିଛନ୍ତି ଯେ ଭାଜପା ‘ଜନସଂଖ୍ୟାଗତ ଦଣ୍ଡ’ ନୀତି କାର୍ଯ୍ୟକାରୀ କରୁଛି । ସେ ଆହୁରି କହିଛନ୍ତି, ‘ସୀମା ନିର୍ଦ୍ଧାରଣ ପ୍ରକ୍ରିୟାରେ ଲୋକ ସଭା ଆସନ ସଂଖ୍ୟା ବୃଦ୍ଧି କରନ୍ତୁ ନାହିଁ ।’ ଆଜି ଦେଶ ସମ୍ମୁଖରେ ଏକ ବଡ଼ ଆହ୍ୱାନ ଅଛି । କିନ୍ତୁ ଦକ୍ଷିଣ ଭାରତ ଜନସଂଖ୍ୟା ଆଧାରରେ ଏହି ସୀମା ନିର୍ଦ୍ଧାରଣକୁ ଗ୍ରହଣ କରିପାରିବ ନାହିଁ । ଏହା ଆମକୁ ରାଜନୈତିକ ଦୃଷ୍ଟିରୁ ସୀମିତ କରିବ । ଏହା ଆମକୁ ଭଲ କାମ (ଜନସଂଖ୍ୟା ନିୟନ୍ତ୍ରଣ ଏବଂ ଆର୍ଥିକ ପ୍ରଗତି) କରିବା ପାଇଁ ଦଣ୍ଡ ଦେବା ପରି ହେବ । ଆମକୁ ବିଜେପିକୁ ସୀମା ନିର୍ଦ୍ଧାରଣ କାର୍ଯ୍ୟକାରୀ କରିବାରୁ ରୋକିବାକୁ ପଡିବ ବୋଲି ବେ?ଠକରେ ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ କହିଛନ୍ତି  ।
ଓଡ଼ିଶାର ବିରୋଧୀ ଦଳ ବିଜୁ ଜନତା ଦଳ ଏବଂ ଆନ୍ଧ୍ର ପ୍ରଦେଶର ବିରୋଧୀ ଦଳ ୱାଇଏସଆର-କଂଗ୍ରେସର ପ୍ରତିନିଧିମାନେ ମଧ୍ୟ ଅଂଶଗ୍ରହଣ କରିଥିଲେ । ସମସ୍ତେ ନିଜ ନିଜ ତଥ୍ୟ ସହିତ ସୀମା ନିର୍ଦ୍ଧାରଣକୁ ବିରୋଧ କରିଥିଲେ  । ଆମେ ସୀମା ନିର୍ଦ୍ଧାରଣ ବିରୋଧରେ ନାହୁଁ । ଆମେ ନିରପେକ୍ଷ ସୀମା ନିର୍ଦ୍ଧାରଣର ସପକ୍ଷରେ । ଯଦି ଜନସଂଖ୍ୟା ଅନୁସାରେ ସୀମା ନିର୍ଦ୍ଧାରଣ କରାଯାଏ, ତେବେ ସଂସଦରେ ଆମର ପ୍ରତିନିଧିତ୍ୱ କମ୍ ହେବ । ଯଦି ଏହା ହୁଏ, ତେବେ ଆମକୁ କେନ୍ଦ୍ର ସରକାରଙ୍କଠାରୁ ପାଣ୍ଠି ପାଇବା ପାଇଁ ସଂଘର୍ଷ କରିବାକୁ ପଡିବ, ଚାଷୀମାନେ ପ୍ରଭାବିତ ହେବେ, ଆମର ସଂସ୍କୃତି ଏବଂ ବିକାଶ ବିପଦରେ ପଡ଼ିବ । ଆମର ନାଗରିକମାନେ ନିଜ ଦେଶରେ କ୍ଷମତା ହରାଇବେ ବୋଲି  ଉପସ୍ଥିତି ନେତାମାନେ କହିଛନ୍ତି ।
ଓଡିଶାର ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୈଠକକୁ ଯାଇ ପାରି ନଥିଲେ ହେଁ ବରିଷ୍ଠ ବିଜେଡି ନେତା ସଂଜୟ ଦାସବର୍ମା ଓ ଅମର ପଟ୍ଟନାୟକଙ୍କୁ ପଠାଇଛନ୍ତି । ବିଜେଡି ସଭାପତି ନବୀନ ପଟ୍ଟନାୟକ ଭିଡିଓ କନଫରେନ୍ସିଂ ମାଧ୍ୟମରେ ଜେଏସିକୁ ସମ୍ବୋଧନ କରିଛନ୍ତି । ତେବେ ବୈଠକରେ ମମତା ବାନାର୍ଜୀଙ୍କ ଟିଏସିର କୌଣସି ସଦସ୍ୟ ଯୋଗ ନଦେବା, ସମସ୍ତଙ୍କୁ ଚକିତ କରିଛି । କାରଣ ସୀମା ନିର୍ଦ୍ଧାରଣ ପ୍ରସଙ୍ଗରେ ଡିଏମକେକୁ ଟିଏମସି ସବୁବେଳେ ସମର୍ଥନ କରି ଆସିଛି । ଷ୍ଟାଲିନ ମଧ୍ୟ ମମତାଙ୍କୁ ଚିଠି ଲେଖି ବୈଠକରେ ଯୋଗ ଦେବାକୁ ଅନୁରୋଧ କରିଥିଲେ । ହେଲେ ଟିଏମସିର କୌଣସି ସଦସ୍ୟ ବୈଠକରେ ସାମିଲ ହୋଇ ନାହାନ୍ତି । ଏହାକୁ ନେଇ ବିରୋଧୀ ମେଣ୍ଟରେ ଫାଟ ଥିବା କଥା ପୁଣି ଚର୍ଚ୍ଚାର ବିଷୟ ପାଲଟିଛି ।