Tags : cyclone

ଭୁବନେଶ୍ବର : ବଙ୍ଗୋପସାଗରରେ ଆସୁଛି ଭୀଷଣ ସାମୁଦ୍ରିକ ଝଡ଼। ସମ୍ଭାବ୍ୟ ବାତ୍ୟା ତାମିଲନାଡୁ ଏବଂ ଶ୍ରୀଲଙ୍କା ଉପକୂଳରେ ସ୍ଥଳଭାଗ ଛୁଇଁପାରେ ବୋଲି ଅଧିକାଂଶ ଘରୋଇ ପାଣିପାଗ ସଂସ୍ଥା ଆକଳନ କରିଛନ୍ତି। ତେବେ ଓଡ଼ିଶା ଉପରେ ବାତ୍ୟାର ପ୍ରଭାବ ରହିବ ନାହିଁ। କେବଳ ଦକ୍ଷିଣ ଓଡ଼ିଶାରେ ହାଲୁକା ବର୍ଷା ହୋଇପାରେ ବୋଲି ପାଣିପାଗ ବିଶେଷଜ୍ଞ ପୂର୍ବାନୁମାନ କରିଛନ୍ତି। ଏହି ବାତ୍ୟା ପ୍ରଭାବ ତାମିଲନାଡୁ, ଶ୍ରୀଲଙ୍କା ଏବଂ ଆନ୍ଧ୍ରପ୍ରଦେଶ ଉପରେ ପଡ଼ିବା ଆଶଙ୍କା ରହିଛି। ବାତ୍ୟା ଆସୁଥିବା ଭାରତୀୟ ପାଣିପାଗ ବିଭାଗ ତା’ର ୱେବସାଇଟ୍‌ରେ ଦର୍ଶାଇଥିଲେ ମଧ୍ୟ ଏହାର ଗତିପଥ ଓ ତୀବ୍ରତା ସ୍ପଷ୍ଟ କରିନାହିଁ। ସମ୍ଭାବ୍ୟ ବାତ୍ୟାର ନାମ ସାଉଦି ଆରବ ଅନୁଯାୟୀ ‘ଫେଙ୍ଗାଲ’ ରହିବ। ଆସନ୍ତା ୨୧ତାରିଖ ସୁଦ୍ଧା ଦକ୍ଷିଣ ଆଣ୍ଡମାନ ସାଗର ଏବଂ ପାର୍ଶ୍ବବର୍ତ୍ତୀ ଅଞ୍ଚଳରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇପାରେ। ୨୩ ତାରିଖ ବେଳକୁ ଦକ୍ଷିଣ-ପୂର୍ବ ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବା ସମ୍ଭାବନା ରହିଛି। ପରବର୍ତ୍ତୀ ୨ଦିନରେ ଏହା ଦକ୍ଷିଣ-ପଶ୍ଚିମ ବଙ୍ଗୋପସାଗରରେ ଅବପାତରେ ପରିଣତ ହୋଇ ପାରେ। ବଙ୍ଗୋପସାଗର ତାପମାତ୍ରା ୨୮ଡିଗ୍ରୀ ଉପରେ ଥିବାରୁ ବାତ୍ୟା ପାଇଁ ସମୁଦ୍ରରେ ପାଗ ଅନୁକୂଳ ରହିଛି। ବାତ୍ୟାକୁ ନେଇ ବିଭିନ୍ନ ଘରୋଇ ପାଣିପାଗ ସଂସ୍ଥାଗୁଡ଼ିକ ଭିନ୍ନ ଭିନ୍ନ ଆକଳନ କରିଛନ୍ତି। ଜିଏଫଏସ୍‌-ଏନସିଆଇସିଏମ ସଂସ୍ଥା ଅବପାତ ବାତ୍ୟା ରୂପ ନେବା ସ୍ପଷ୍ଟ କରିଛି। ନଭେମ୍ବର ୨୫ରୁ ୩୦ତାରିଖ ମଧ୍ୟରେ ତାମିଲନାଡୁ-ଶ୍ରୀଲଙ୍କା ଉପକୂଳରେ ସ୍ଥଳଭାଗ ଛୁଇଁପାରେ। ଆଇଏମଡି-ଜିଏଫଏସ ସଂସ୍ଥା କହୁଛି, ଭୀଷଣ ବାତ୍ୟା ରୂପରେ ଦକ୍ଷିଣ-ପୂର୍ବ ଶ୍ରୀଲଙ୍କା ଏବଂ ଦକ୍ଷିଣ ତାମିଲନାଡୁ ମଧ୍ୟରେ ସ୍ଥଳଭାଗ ଅତିକ୍ରମ କରିପାରେ। ଏନସିଇପି-ଜିଏଫଏସ ସଂସ୍ଥା ଝଡ଼ ୨୬ ତାରିଖ ବେଳକୁ ଭୀଷଣ ବାତ୍ୟା ରୂପନେଇ ଦକ୍ଷିଣ ଶ୍ରୀଲଙ୍କା ଉପକୂଳ ଛୁଇଁପାରେ ଦର୍ଶାଇଛି। ପରବର୍ତ୍ତୀ ସମୟରେ ଉତ୍ତର-ପଶ୍ଚିମ ଦିଗରେ ଗତି କରି ଦୁର୍ବଳ ହୋଇ ୨୯ତାରିଖ ବେଳକୁ ଆନ୍ଧ୍ରପ୍ରଦେଶ ଏବଂ ତାମିଲନାଡୁ ଉପକୂଳ ଆଡକୁ ମୁହାଁଇବ। ଏନସିୟୁଏମ(ଆର) ସଂସ୍ଥା ୨୬ରୁ ୨୭ ତାରିଖ ମଧ୍ୟରେ ସମ୍ଭାବ୍ୟ ସାମୁଦ୍ରିକ ଝଡ଼ ଶ୍ରୀଲଙ୍କା ଏବଂ ଦକ୍ଷିଣ ତାମିଲନାଡୁ ମଧ୍ୟରେ ସ୍ଥଳଭାଗ ଅତିକ୍ରମ କରିବା ସମ୍ଭାବନା ଥିବା ସ୍ପଷ୍ଟ କରିଛି। ଇସିଏମଡବ୍ଲ୍ୟୁଏଫ ମଡେଲ ସିଷ୍ଟମ ଗଭୀର ଅବପାତରେ ରହିବା ନେଇ ଆକଳନ କରିଛି। ୨୭ତାରିଖ ବେଳକୁ ବାତ୍ୟା ଶ୍ରୀଲଙ୍କା ଏବଂ ତାମିଲନାଡୁ ଆଡକୁ ମୁହାଁଇବା ସମ୍ଭାବନା ଥିବା ଆକଳନ କରିଛି।