Tags : assembly

ଭୁବନେଶ୍ୱର: ଶେଷ ହେଲା ସପ୍ତଦଶ ବିଧାନସଭା ଅଧିବେଶନ । ଅନିର୍ଦ୍ଧିଷ୍ଟ କାଳ ପାଇଁ ଗୃହକୁ ମୂଲତବୀ ଘୋଷଣା କଲେ ବାଚସ୍ପତି ।  ଆଗକୁ କୌଣସି ଗୁରୁତ୍ୱପୂର୍ଣ୍ଣ କାର୍ୟ୍ୟକ୍ରମ ନଥିବାରୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ଘୋଷଣା ଲାଗି ପ୍ରସ୍ତାବ ଆଣିଥିଲେ ସରକାରୀ ଦଳ ମୁଖ୍ୟ ସଚେତକ। ଯାହାକୁ ସମର୍ଥନ କରିଥିଲେ ଏକାଧିକ ବିଧାୟକ। ପରେ ବାଚସ୍ପତି ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବି କରିଛନ୍ତି ବାଚସ୍ପତି ସୁରମା ପାଢୀ।

ଦୀର୍ଘ ଦଶନ୍ଧିର ରେକର୍ଡ ଭାଙ୍ଗିଥିଲା ବିଧାନସଭାର ଏହି ବଜେଟ ଅଧିବେଶନ । ବୁଧବାର ସାରାରାତି ଚାଲିଥିଲା ଗୃହ କାର୍ୟ୍ୟ । ଏହି ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଣିଥିଲେ ୨୦୨୫-୨୬ ଆର୍ଥିକ ବର୍ଷର ପୂର୍ଣ୍ଣାଙ୍ଗ ବଜେଟ । ରାଜ୍ୟପାଳ ଗୃହକୁ ସମ୍ବୋଧନ କରିଥିଲେ। ଦୁଇଟି ବିଭାଗର ଆଇନ ପ୍ରଣୟନ ବିଲ ଗୃହରେ ପାରିତ ହୋଇଛି । ବିଶ୍ଵ ବିଦ୍ୟାଳୟ ସଂଶୋଧନ ବିଲ୍ ୨୦୨୪ ଓ ଓଡ଼ିଶା ରାଜ୍ୟ ରାଜପଥ ପ୍ରାଧିକରଣ ୨୦୨୫ ବିଲ ପାରିତ ହୋଇଛି।  ଚଳିତ ଅଧିବେଶନରେ ୨୫ଟି କାର୍ୟ୍ୟ ଦିବସ ଅନୁଷ୍ଠିତ ହୋଇଛି। ରୋଚକ ଥିଲା ଏହି ଅଧିବେଶନ। ଗୃହରେ ଜୋରଦାର ପ୍ରତିବାଦ ପାଇଁ ଗୃହରୁ ନିଲମ୍ବନ ହୋଇଥିଲେ ସମସ୍ତ କଂଗ୍ରେସ ବିଧାୟକ।