Tags : assembly

ଭୁବନେଶ୍ବର: ଜୟ ନାରାୟଣଙ୍କ ବିବାଦୀୟ ବିବୃତ୍ତିକୁ ନେଇ ଜାରି ରହିଛି ତୁମ୍ଭି ତୋଫାନ । "ଓଡିଶାରେ ମିଶିବା ଏକ ଐତିହାସିକ ଭୁଲ" ବୋଲି ମନ୍ତବ୍ୟ ଦେଇଥିଲେ ବିଜେପି ବିଧାୟକ ଜୟ ନାରାୟଣ ମିଶ୍ର । ତେବେ ଜୟ ନାରାୟଣଙ୍କ ମନ୍ତବ୍ୟକୁ ନେଇ ମୁହଁ ଖୋଲିଛି ଶାସକ ଦଳ । ଏହା ତାଙ୍କର ବ୍ୟକ୍ତିଗତ ମତ, ସରକାର ସହମତ ନୁହନ୍ତି ବୋଲି କହିଛନ୍ତି ଆଇନ ମନ୍ତ୍ରୀ । ଉକ୍ତ ପ୍ରସଙ୍ଗରେ ଦୁଇ ଦିନ ଧରି ବିଜେଡି ବିଧାନସଭାରେ ବିକ୍ଷୋଭ ପ୍ରଦର୍ଶନ କରୁଥିଲେ ବିରୋଧୀ ।
ଆଇନ ମନ୍ତ୍ରୀ ବିଧାନସଭାରେ ବିଜେପିର ବରିଷ୍ଠ ବିଧାୟକ ଜୟ ନାରାୟଣ ମିଶ୍ର ମନ୍ତବ୍ୟ ଉପରେ ବିବୃତ୍ତି ରଖିଛନ୍ତି । ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି, "ଓଡିଶାରେ ମିଶିବା ଏକ ଐତିହାସିକ ଭୁଲ" ଏହା ଜୟ ନାରାୟଣଙ୍କର ବ୍ୟକ୍ତିଗତ ମନ୍ତବ୍ୟ । ଏହି ମନ୍ତବ୍ୟରେ ରାଜ୍ୟ ସରକାର ସହମତ ନୁହଁନ୍ତି । ରାଜ୍ୟ ସରକାର ଗଠନମୂଳକ ବିକାଶ ଉପରେ ଗୁରୁତ୍ୱ ଦେଉଛନ୍ତି । ପଶ୍ଚିମ ଓଡିଶା ବିକାଶ ପରିଷଦ ଜରିଆରେ ଅଞ୍ଚଳର ବିକାଶ କରାଯାଉଛି । ସେହିପରି ଦକ୍ଷିଣ ଓ ଉତ୍ତର ଓଡିଶା ବିକାଶ ପରିଷଦ ଗଠନ ପ୍ରକ୍ରିୟା ଜାରି ରହିଛି ।"

ଆଇନ ମନ୍ତ୍ରୀଙ୍କ ବିବୃତ୍ତି ପରେ ପ୍ରତିକ୍ରିୟା ରଖିଛନ୍ତି ବିଜେଡି ବିଧାୟକ ଅରୁଣ ସାହୁ । ଅରୁଣ କହିଛନ୍ତି, "ବିଧାନସଭା ପରିଚାଳନା ରାଜ୍ୟ ସରକାରଙ୍କ ଦାୟିତ୍ୱ । ବିଧାନସଭାର ଏହି ଅଧିବେଶନ ଆରମ୍ଭ ପୂର୍ବରୁ ଆକ୍ସନ ନେବୁ ବୋଲି ବାଚସ୍ପତି କହିଥିଲେ । ସରକାରୀ କାର୍ୟ୍ୟକ୍ରମରେ ବିଜେପିର ବରିଷ୍ଠ ସଦସ୍ୟ ଜୟ ନାରାୟଣ ମିଶ୍ର ଓଡିଶାକୁ ବିଖଣ୍ଡିତ କରିବା ଭଳି ଏକ ମନ୍ତବ୍ୟ ଦେଇଥିଲେ । ଓଡିଶାରେ ମିଶିବା ଏକ ଐତିହାସିକ ଭୁଲ ବୋଲି କହିଥିଲେ । ବିଜେପିର ଜଣେ ବରିଷ୍ଠ ନେତାଙ୍କ ମନ୍ତବ୍ୟ ହୋଇଥିବାରୁ ମୁଖ୍ୟମନ୍ତ୍ରୀ ଗୃହରେ ବିବୃତ୍ତି ରଖିବାକୁ ବିଜେଡି ଦାବି କରିଥିଲା । ମୁଖ୍ୟମନ୍ତ୍ରୀ ଭୁବନେଶ୍ୱରରେ ନଥିବାରୁ ଉପମୁଖ୍ୟମନ୍ତ୍ରୀ ଗୃହରେ ବିବୃତି ରଖିବେ ବୋଲି ଗତକାଲି ରାଜ୍ୟ ବିଜେପି ସଭାପତି ମନମୋହନ ସାମଲ କହିଥିଲେ । କିନ୍ତୁ ଉପମୁଖ୍ୟମନ୍ତ୍ରୀ ବିବୃତ୍ତି ରଖିଲେ ନାହିଁ । ଆଇନ ମନ୍ତ୍ରୀ ବିବୃତ୍ତି ରଖିଛନ୍ତି । ଅର୍ଥାତ ବିଜେପି ଯାହା କୁହେ, ତାହା କରେ ନାହିଁ । ଓଡ଼ିଶାର ଅଖଣ୍ଡତାକୁ ନେଇ ବିଜେଡି ବିକ୍ଷୋଭ କରୁଥିଲା । ମହିଳା ଅତ୍ୟାଚାର ଓ ଆଇନ ଶୃଙ୍ଖଳା ପ୍ରସଙ୍ଗରେ କଂଗ୍ରେସ ବିକ୍ଷୋଭ କରିଥିଲା ।"