Tags : accident

ମୁମ୍ବାଇ: ଭୟଙ୍କର ସଡ଼କ ଦୁର୍ଘଟଣା । ତିନୋଟି ଗାଡ଼ି ମଧ୍ୟରେ ଧକ୍କା । ଦୁର୍ଘଟଣାରେ ୫ ଜଣ ଯାତ୍ରୀଙ୍କ ମୃତ୍ୟୁ ହୋଇଥିବା ବେଳେ, ପାଖାପାଖି ୨୪ ଜଣ ଆହତ ହୋଇଛନ୍ତି । ଆହତମାନଙ୍କୁ ଚିକିତ୍ସା ପାଇଁ ସ୍ଥାନୀୟ ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଛି । ସେମାନଙ୍କ ମଧ୍ୟରୁ ୬ ଜଣଙ୍କ ସ୍ବାସ୍ଥ୍ୟାବସ୍ଥା ଅତି ସଙ୍କଟାପନ୍ନ ରହିଛି । ମହାରାଷ୍ଟ୍ରର ଖାମଗାଓଁ ଶେଗାଓଁ ରାଜପଥରେ ଏହି ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ।
ଆଜି ସକାଳ ପ୍ରାୟ ୫ଟାରେ ମହାରାଷ୍ଟ୍ର ବୁଲଧାନା ଜିଲ୍ଲା ଖାମଗାଓଁ-ଶେଗାଓଁ ରାଜପଥରେ ଏକ ଭୟଙ୍କର ଦୁର୍ଘଟଣା ଘଟିଥିଲା । ପ୍ରାଥମିକ ସୂଚନା ଅନୁଯାୟୀ, ଏକ ଦ୍ରୁତଗାମୀ ବୋଲେରୋ ଶେଗାଓଁରୁ କୋଲହାପୁର ଯାଉଥିଲା । ବାଟରେ ପୁଣେରୁ ପାତରାୱାଡା ଯାଉଥିବା ଏକ ରାଜ୍ୟ ପରିବହନ ବସ୍‌କୁ ମୁହାଁମୁହିଁ ଧକ୍କା ଦେଇଥିଲା । ଏହି ଘଟଣା ପରେପରେ ପଛରୁ ଆସୁଥିବା ଅନ୍ୟ ଏକ ଘରୋଇ ଯାତ୍ରୀବାହୀ ବସ୍ ଉଭୟ ଗାଡ଼ିକୁ ଜୋର୍‌ରେ ଧକ୍କା ଦେଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ, ବୋଲେରୋଟି ଖଣ୍ଡ ଖଣ୍ଡ ହୋଇଛି । ଉଭୟ ବସ୍ ମଧ୍ୟ ଭାଙ୍ଗି ଯାଇଛି ।
ଗୋଟିଏ ପରେ ଗୋଟିଏ ତିନୋଟି ଗାଡ଼ି ଧକ୍କା ହେବା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା । ସ୍ଥାନୀୟ ଅଞ୍ଚଳର ଲୋକମାନେ ଘଟଣାସ୍ଥଳରେ ପହଞ୍ଚିଥିଲେ । ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ପୋଲିସ ଉଦ୍ଧାର କାର୍ୟ୍ୟ ଆରମ୍ଭ କରିଥିଲା । ଘରୋଇ ବସ୍‌ର ସମ୍ମୁଖ ଭାଗରେ ଫସି ରହିଥିବା ଡ୍ରାଇଭରଙ୍କୁ ବହୁତ ଚେଷ୍ଟା ପରେ ବାହାର କରାଯାଇଥିଲା । ଦୁର୍ଘଟଣାରେ ଘଟଣାସ୍ଥଳରେ ୪ ଜଣଙ୍କର ମୃତ୍ୟୁ ହୋଇଛି । ଆହତଙ୍କୁ ତୁରନ୍ତ ଖାମଗାଁଓର ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଗୁରୁତର ଆହତଙ୍କୁ ଅଧିକ ଚିକିତ୍ସା ପାଇଁ ବୁଲଢାନା ପଠାଯାଇଛି ।ହସ୍ପିଟାଲରେ ଚିକିତ୍ସିତ ସମୟରେ ଆଉ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି । ବର୍ତ୍ତମାନ ସୁଦ୍ଧା ମୋଟ ୫ ଜଣଙ୍କ ମୃତ୍ୟୁ ହୋଇଛି । ମୃତ୍ୟୁ ସଂଖ୍ୟା ବୃଦ୍ଧି ପାଇବାର ଆଶଙ୍କା ରହିଛି । ପୋଲିସ ଇନ୍ସପେକ୍ଟର ରାମକୃଷ୍ଣ ପାୱାର କହିଛନ୍ତି, "ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ପୋଲିସ ଏହି ଘଟଣାର ତଦନ୍ତ କରୁଛି । ତିନୋଟି ଗାଡି ଜବତ କରାଯାଇଛି ।"