Tags : 3 arrested

କୁଚିଣ୍ଡା: କୁଚିଣ୍ଡାରୁ ଅପହରଣ କରି ପ୍ରେମିକାକୁ ହତ୍ୟା କରିଥିବା ମାମଲାରେ ୩ ଜଣଙ୍କୁ ଗିରଫ କରିଛି ପୁଲିସ୍ । ମୁଖ୍ୟ ଅଭିଯୁକ୍ତ ପ୍ରେମିକ ଅନୀଲ ପୃଷେଠ ସହ ତା’ର ବନ୍ଧୁ ସୁଭିତ୍ ମାକର ଓ ଅଶୋକ କିସାନକୁ କୋର୍ଟ ଚାଲାଣ କରାଯାଇଛି । ଏପଟେ ରବିବାର କୁଚିଣ୍ଡା ଉପଖଣ୍ଡ ମୁଖ୍ୟ ଚିକିତ୍ସାଳୟର ଏକ ଡାକ୍ତରୀ ଟିମ୍ ଶବ ବ୍ୟବଚ୍ଛେଦ କରିଛନ୍ତି । ଫୋରେନ୍ସିକ୍ ଟିମ୍ ବିଭିନ୍ନ ନମୁନା ସଂଗ୍ରହ କରିଛନ୍ତି । ହତ୍ୟାରେ ବ୍ୟବହୃତ ଓଢ଼ଣୀ, ଗୋଟିଏ ବୋଲେରୋ ଗାଡ଼ି, ଗୋଟିଏ ମୋବାଇଲ୍ ଏବଂ ଅନ୍ୟ ବାୟୋଲୋଜିକାଲ୍ ସାମଗ୍ରୀ ଜବତ ହୋଇଛି ।

କୁଚିଣ୍ଡା ପୁଲିସ୍‌ର ସୂଚନା ଅନୁସାରେ, କୁଚିଣ୍ଡା ଥାନା କୁସୁମୀ ଫାଣ୍ଡି ମହୁଲଗୁଡ଼ା ଗାଁର ସରିତା ସା (୨୪) କୁଚିଣ୍ଡାର ଏକ ପାର୍ଲରରେ ଗତ ୮ ମାସ ହେଲା କାମ କରୁଥିଲା । କୁଚିଣ୍ଡା ଥାନା ତେଲିକୁଣ୍ଡାପୋଷି ଗାଁର ଅନୀଲ ସହ ଏହା ପୂର୍ବରୁ ଅର୍ଥାତ ପ୍ରାୟ ୨ ବର୍ଷ ହେଲା ପ୍ରେମ ସମ୍ପର୍କ ଥିଲା । ସେ ଜଣେ ପାଇପ୍ ମିସ୍ତ୍ରୀ ଭାବେ କାମ କରୁଥିଲେ । ହେଲେ ଗତ କିଛି ମାସ ହେଲେ ସରିତା ତୁରନ୍ତ ବିବାହ କରିବାକୁ ଅନୀଲକୁ ବାଧ୍ୟ କରିଆସୁଥିଲେ । କିନ୍ତୁ ଏହାକୁ ଟାଳି ଚାଲିଥିଲା ଅନୀଲ । ତେଣୁ ସରିତାକୁ ଜୀବନରୁ ମାରିଦେବାକୁ ଯୋଜନା କରିଥିଲା । ଗତ ୧୬ ତାରିଖରେ ଏହାକୁ କାର୍ଯ୍ୟକାରୀ କରିବାକୁ ଯୋଜନା କରିଥିଲା ଅନୀଲ । ୧୬ ତାରିଖରେ ସନ୍ଧ୍ୟାରେ ବୁଲି ଯିବାକୁ ପ୍ରେମିକା ସରିତାକୁ କହିଥିଲା ଅନୀଲ । ତେଣୁ ଅନୀଲ ପୂର୍ବ ଯୋଜନା ଅନୁସାରେ ଗୋଟିଏ ବୋଲେରୋରେ ୨ ଜଣ ବନ୍ଧଙ୍କ ସହ ଆସିଥିଲେ । ସ୍କୁଟିରେ ପାର୍ଲର ସମ୍ମୁଖରୁ ସରିତାକୁ ନେଇଥିଲା ଅନୀଲ । ପରେ ବୋଲେରୋରେ ଜମନକିରା ପଟକୁ ଯାଇଥିଲେ । ଅଶୋକ ଗାଡ଼ି ଚଳାଉଥିବାବେଳେ ସୁଭିତ୍ ସାମ୍ନା ପଟର ସିଟ୍‌ରେ ବସିଥିଲା । ଗାଡ଼ିରେ ଯାଉଥିବାବେଳେ ସରିତା ଓ ଅନୀଲଙ୍କ ମଧ୍ୟରେ ବିବାହକୁ ନେଇ ଝଗଡ଼ା ହୋଇଥିଲା । ଏହି ସମୟରେ ସରିତା ଧରିଥିବା ଓଢ଼ଣୀରେ ତଣ୍ଟି ଚିପି ହତ୍ୟା କରିଥିଲା ଅନୀଲ । ପରେ ୩ ଜଣ ମିଶି ଶବକୁ ବଡ଼ରମା ଘାଟିରେ ପକାଇ ଦେଇଥିଲେ । ହେଲେ ସରିତାଙ୍କ ବାପା ଅନୀଲ ନାଁଁରେ ସିଧାସଳଖ ଏତଲା ଦେବାରୁ ପୁଲିସ୍ ତାକୁ ଆଣି ପଚରାଉଚରା କରିଥିଲେ ।
ଜଣେ ପୁଲିସ୍ ଅଧିକାରୀଙ୍କ ସୂଚନା ଅନୁସାରେ, ଅନୀଲ ଏହାକୁ ଚାପିବାକୁ ବହୁ ଚେଷ୍ଟା କରିଥିଲା । ସରିତା ସହ ସେ କୌଣସି ଆଡ଼େ ଯାଇନଥିବା କହିଥିଲେ। କେବଳ କୁଚିଣ୍ଡା ପଡ଼ିଆରେ ଶେଷ ଦେଖା ହୋଇଥିବା କହିଥିଲେ । କିନ୍ତୁ ଅନୀଲ ଓ ସରିତାର ମୋବାଇଲ୍ ଟ୍ରାକିଂ, ସିଡିଆର୍ ଏବଂ ମୋବାଇଲ୍ ଟାୱାର ଡମ୍ପ୍ ଡିଟେଲ୍ରୁ ଜଣାପଡ଼ିଥିଲା । ଏହାସହ ପୁଲିସ୍କୁ ଚକମା ଦେବାକୁ ମିଛ ନାଟକ ରଚିଥିଲା । ଏମିତି କି, ବିଭିନ୍ନ ସ୍ଥାନକୁ ନେଇ ଶବ ରଖିଥିବା କହିଥିଲା । କିନ୍ତୁ ଶେଷରେ ସ୍ୱୀକାର କରିବା ସହ ଶବ ପକାଇଥିବା ସ୍ଥାନକୁ ନେଇଥିଲା ଅନୀଲ । ଶବ ମିଳିବା ସହ ଘଟଣାର ପର୍ଦ୍ଦାଫାଶ ହୋଇଥିଲା ବୋଲି ସେ କହିଛନ୍ତି ।