ଭୁବନେଶ୍ୱର: ପାଟକୁରା ବିଧାନସଭା ନିର୍ବାଚନର ଫଳାଫଳ ବିଜେଡି ସପକ୍ଷରେ ଯାଇଛି । ନିର୍ବାଚନରେ ବିଜେଡି ପ୍ରାର୍ଥୀ ସାବିତ୍ରୀ ଅଗ୍ରୱାଲ ବାଜିମାତ ମାରିଛନ୍ତି ।  ତେବେ ଶୁକ୍ରବାର ନିର୍ବାଚନ ହାରିବା ପରେ ବର୍ଷିଛନ୍ତି ବିଜେପି ପ୍ରାର୍ଥୀ ବିଜୟ ମହାପାତ୍ର ।  ପରୋକ୍ଷରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନିଶାନା କରି ଶ୍ରୀ ମହାପାତ୍ର ବିଷ ଓଗାଳିଛନ୍ତି । 

 ଏକ ବୈଦୁ୍ୟତିକ ଗଣମାଧ୍ୟମକୁ ସାକ୍ଷାତକାର ଦେବା ଅବସରରେ ଶ୍ରୀ ମହାପାତ୍ର କହିଛନ୍ତି ଯେ,  ପୂର୍ବରୁ ଏପରି ନିର୍ବାଚନ କେବେ ଦେଖିନଥିଲି, ନା ଆଗକୁ କେବେ ଦେଖିବି ।  ଏପରି ଘେରାବନ୍ଦୀ କଲେ ଯେମିତି ଆଇନଶୃଙ୍ଖଳା ପରିସ୍ଥିତି ଉପୁଜିଛି ।  କିଲ ବିଜୟ ପ୍ରୋଜେକ୍ଟ ସଫଳ ହୋଇଛି । ଅଭିନନ୍ଦନ ଜଣାଉଛି ।   ରାଜନୀତିରେ ସମସ୍ତଙ୍କ ପାଇଁ ଦିନେ ନା ଦିନେ ପୂର୍ଣ୍ଣଚ୍ଛେଦ ପଡେ଼ ।  ତାଙ୍କ ପାଇଁ ଆସିବ ଓ ମୋ ପାଇଁ ମଧ୍ୟ ପୂର୍ଣ୍ଣଚ୍ଛେଦ ସମୟ ଆସିବ ।  ତାଙ୍କ ପୂର୍ଣ୍ଣଚ୍ଛେଦ ବେଳେ ମୁଁ ଥିବି, ମୋ ପୂର୍ଣ୍ଣଚ୍ଛେଦ ବେଳେ ସେ ନଥିବେ ।  ରାଜନୀତିରେ କେହି ଅଜେୟ ଓ ଅମର ହୋଇ ରହିପାରିବ ନାହିଁ ।  ଘେରାବନ୍ଦୀ କରିଥିବା ନବୀନଙ୍କ ସେନାବାହିନୀ ସହ କଥା ହୋଇଛି ।  ମୋ ସହ ଆଲୋଚନା ବେଳେ ଅନ୍ତରର ସମର୍ଥନ ଜଣାଇଛନ୍ତି ।  ସେମାନେ ଜାଣିନାହାନ୍ତି ସେମାନଙ୍କ ଭବିଷ୍ୟତ କଣ ହେବ । ସାଧାରଣ ନିର୍ବାଚନ ବେଳେ ଭୋଟ ହୋଇଥିଲେ ଫଳ ଅଲଗା ହୋଇଥାନ୍ତା । ଉଦେ୍ଧଶ୍ୟମୂଳକଭାବେ ନିର୍ବାଚନକୁ ବିଳମ୍ବ କରାଗଲା । 

ଅନ୍ୟପକ୍ଷରେ ବିଜୟ ମହାପାତ୍ରଙ୍କ ଅଭିଯୋଗକୁ  ଭୁଲ ବୋଲି କହିଛନ୍ତି ବିଜେଡି ବିଧାୟକ ପ୍ରତାପ ଦେବ । ସେ କହିଛନ୍ତି ଯେ,  ଘେରାବନ୍ଦୀ ରାଜନୀତି ବିଜୁ ବାବୁଙ୍କ ଅମଳରୁ ଆରମ୍ଭ ହୋଇଛି ।  ରାଇରଙ୍ଗପୁର ଉପନିର୍ବାଚନରେ ହୋଇଥିଲା । ସେତେବେଳେ ବିଜୟ ବାବୁ ସେନାପତି ଥିଲେ ।  ଆମେ ସବୁ ଉପନିର୍ବାଚନରେ ଏମିତି ମିଶି କରି ଲଢିଛୁ ।  ଦୁଇ ପ୍ରାର୍ଥୀଙ୍କ ଭିତରେ ଯେମିତି ଲଢେଇ ହୁଏ, ସେମିତି ଲଢିଛୁ । ଘେରାବନ୍ଦୀ ଅଭିଯୋଗ ଭୁଲ, ଆମେ ମୋଟ ୨୧ ବିଧାୟକ ଓ ମନ୍ତ୍ରୀ ଥିଲୁ ।  କିଲ ବିଜୟ ଉକ୍ତି ଗଣମାଧ୍ୟମର ମନଗଢା କାହାଣୀ ।  ରାଜନୀତିରେ ପୂର୍ଣ୍ଣଚ୍ଛେଦ ପକାଇବାର  ଏକମାତ୍ର କ୍ଷମତା ଭୋଟରଙ୍କର ବୋଲି ପ୍ରତାପ ଦେବ କହିଛନ୍ତି । 

Tags : bijya mohaptara