Jan 22, 2019
ମୁଖ୍ୟ ଖବର
ଭୁବନେଶ୍ୱର : ଉପା ହେଉକି ଏନଡ଼ିଏ ବିଜେଡ଼ି ସଭାପତି ନବୀନ ପଟ୍ଟନାୟକଙ୍କ ରଣନୀତିକୁ କେହି ଠଉରାଇ ପାରୁନାହାନ୍ତି । କେଉଁ ପ୍ରସଙ୍ଗରେ ନବୀନ କାହାକୁ ସମର୍ଥନ କରିବେ, ୨୦୧୯ ପରେ କାହା ଆଡ଼କୁ ଢଳିବେ ତାହାର ଟେର ମିଳୁନାହିଁ । ଫଳରେ କଂଗ୍ରେସ ଓ ବିଜେପି ଭଳି ଜାତୀୟ ଦଳଗୁଡ଼ିକ ବହୁ ଅକଳରେ ପଡ଼ି ଯାଉଥିବା ଲକ୍ଷ୍ୟ କରାଯାଉଛି । ପରୋକ୍ଷରେ ଏହା ମଧ୍ୟ ବିଜେଡ଼ିକୁ ବେଶ ସୁହାଉଛି । ନବୀନ କେଉଁ ପଟକୁ ଯିବେ ସ୍ପଷ୍ଟ ହେଉନଥିବାରୁ ଅନେକ ସମୟରେ ବିଜେପି ଓ କଂଗ୍ରେସ ମଧ୍ୟ ବିଜେଡ଼ି ପ୍ରତି ନରମ ଆଭିମୁଖ୍ୟ ପୋଷଣ କରୁଥିବା ଦେଖିବାକୁ ମିଳୁଛି ।
୨୦୧୯କୁ ନେଇ ଜାତୀୟ ରାଜନୀତିରେ ଅଙ୍କକଷା ଜୋରଧରିଛି । ଏନଡ଼ିଏ ଓ ଉପା ମେଂଟ ପରେ ଏବେ ମହାମେଂଟ କଥା ଉଠିଲାଣି । ତୃତୀୟ ସାମ୍ମୁଖ୍ୟକୁ ନେଇ ମଧ୍ୟ ଚର୍ଚ୍ଚା ଜାରିରହିଛି । ହେଲେ ନବୀନ ହେଉଛନ୍ତି ଭାରତର ଏକମାତ୍ର ନେତା ଯିଏ ଏପର୍ଯ୍ୟନ୍ତ କାହାକୁ ମଧ୍ୟ ଧରା ଦେଉନାହାନ୍ତି । ପୂର୍ବରୁ ଉପା ଓ ଏନଡ଼ିଏ ସହ ସମଦୂରତ୍ୱ ରକ୍ଷା କରି ଆସୁଥିବା ନବୀନ ଏବେ ତୃତୀୟ ସାମ୍ମୁଖ୍ୟ ଠାରୁ ମଧ୍ୟ ନିଜକୁ ଦୂରେଇ ରଖିଛନ୍ତି । ଅପରପକ୍ଷରେ ଓଡ଼ିଶାରେ ବିଜେଡ଼ିର ବହୁତ ଦବଦବା ଥିବାରୁ ଜାତୀୟ ରାଜନୀତିରେ ମଧ୍ୟ ନବୀନଙ୍କ ଭାଉ ବଢ଼ିଥିବା ପରିଲକ୍ଷିତ ହୋଇଛି ।
ଆଗାମୀ ସାଧାରଣ ନିର୍ବାଚନରେ ରାଜନୀତିକ ସ୍ଥିତି କ’ଣ ରହିବ ତାହା ଏଯାଏଁ ଆକଳନ କରାଯାଇପାରୁନାହିଁ । କାହିଁକିନା କୌଣସି ଏକ ଦଳ ନିଶ୍ଚିତ ବାଜିମାତ କରିବ ବୋଲି ଜଣାପଡ଼ୁନାହିଁ । ବର୍ଷକ ତଳେ ବିଜେପି ପୁଣି ନିଶ୍ଚିତ ସରକାରକୁ ଆସିବ ବୋଲି ଏକ ଧାରଣା ସୃଷ୍ଟି ହୋଇଥିଲା । କିନ୍ତୁ କର୍ଣ୍ଣାଟକ ଓ ପରେପରେ ରାଜସ୍ଥାନ, ଛତିଶଗଡ଼ ଓ ମଧ୍ୟପ୍ରଦେଶରେ ବିଜେପି କ୍ଷମତା ଦଖଲ କରିବାରେ ବିଫଳ ହେବାରୁ ରାଜନୀତିକ ଗଣିତ ଓଲଟପାଲଟ ହୋଇଯାଇଛି । ଯେଉଁ କଂଗ୍ରେସ ଏକଦା ନିଜର ସ୍ଥିତି ହରାଇବ ବୋଲି ଜଳଜଳ କରି ଦୃଶ୍ୟମାନ ହେଉଥିଲା ଏବେ ସେଇ କଂଗ୍ରେସ ପୁଣି ଥରେ ପୁରୁଣା ଟ୍ରାକକୁ ଫେରିଛି । ପଞ୍ଜାବରେ କ୍ଷମତା ଦଖଲ କରିଥିବା କଂଗ୍ରେସ କର୍ଣ୍ଣାଟକରେ ମେଂଟ ସରକାର କରିଛି । ବିଜେପି ହାତରୁ ୩ ରାଜ୍ୟ ଛଡ଼ାଇ ଆଣି ଏବେ ଜାତୀୟ ରାଜନୀତିରେ ପତିଆରା ବିସ୍ତାର କରୁଛି । ତଥାପିବି ଏନଡ଼ିଏ ଓ ଉପା ପାଇଁ ଦିଲ୍ଲୀ ସିଂହାସନର ରାସ୍ତା କଂଟକିତ ରହିଛି । ଏହି ପରିପ୍ରେକ୍ଷୀରେ ଆଂଚଳିକ ଦଳଗୁଡ଼ିକ ଏକ ପ୍ରମୁଖ ଭୂମିକା ଗ୍ରହଣ କରିବାକୁ ଯାଉଛନ୍ତି । ଏବେ ଭାରତରେ ଯେତିକ ଆଂଚଳିକ ଦଳ ବା ନେତା ଅଛନ୍ତି ସେମାନଙ୍କ ମଧ୍ୟରୁ ବିଜେଡ଼ି ଓ ନବୀନ ହିଁ କ୍ରମାଗତ ଭାବେ ଅଧିକ ଦିନ ଧରି କ୍ଷମତାରେ ରହିଛନ୍ତି । ଦୀର୍ଘ ଦୁଇ ଦଶନ୍ଧି ଧରି କ୍ଷମତାରେ ଥିଲେ ମଧ୍ୟ ସରକାରୀ ବିରୋଧୀ ହାୱା ସେତେଟା ପରିଲକ୍ଷିତ ହୋଇନାହିଁ । ବରଂ ୨୦୧୯ରେ ପୁଣି ବିଜେଡ଼ି କ୍ଷମତାକୁ ଫେରିବାର ଯଥେଷ୍ଟ ସମ୍ଭାବନା ସୃଷ୍ଟିହୋଇଛି । ଫଳତଃ ନବୀନଙ୍କ ଉପରେ ସମସ୍ତଙ୍କ ନଜର ରହିବା ସ୍ୱାଭାବିକ । ଗତ ୨୦୧୪ରେ ଲୋକସଭାକୁ ବିଜେଡ଼ି ୨୦ ସାଂସଦ ପଠାଇ ଏକ ମହତ୍ୱପୂର୍ଣ୍ଣ ଦଳ ଭାବେ ପରିଗଣିତ ହେଉଛି । ରାଜ୍ୟସଭାରେ ବି ଦଳର ୯ ସାଂସଦ ରହିଛନ୍ତି । ତେବେ ଏନଡ଼ିଏ, ଉପା ବା ତୃତୀୟ ସାମ୍ମୁଖ୍ୟ ସହ ଗଲେ ବିଜେଡ଼ି ବା ନବୀନ ରାଜନୈତିକ ଦୃଷ୍ଟିକୋଣରୁ ସେଭଳି ଫାଇଦା ପାଇପାରିବେ ନାହିଁ । ଯେଉଁଥିପାଇଁ ନବୀନ ତିନି ପକ୍ଷଙ୍କ ଠାରୁ ଦୂରେଇ ରହୁଛନ୍ତି । ଅନ୍ତତଃ ନିର୍ବାଚନ ପର୍ଯ୍ୟନ୍ତ ନବୀନ ନିଜର କାଡର଼୍ ଖୋଲିବେନି ବୋଲି କୁହାଯାଇପାରିବ ।
Comments ସମସ୍ତ ମତାମତ 0