ଗୌହ୍ୱାଟୀ/ଭୁବନେଶ୍ୱର : ଆନ୍ଧ୍ରପ୍ରଦେଶରୁ ଆସୁଥିବା ମାଛରେ ରସାୟନିକ ପଦାର୍ଥ ଫର୍ମାଲିନ ରହିଛି  । ଏହି ଫର୍ମାଲିନ ପାଇଁ କ୍ୟାନସର ହେବାର ବି ଆଶଙ୍କା ରହିଛି  । ଆସାମ ସରକାର ଆନ୍ଧ୍ର ମାଛ ପରୀକ୍ଷା କରିବା ପରେ ଏହି ନିଷ୍କର୍ସରେ ପହଁଛିଛନ୍ତି  । ଯେଉଁଥିପାଇଁ ଖାଲି ଆନ୍ଧ୍ରପ୍ରଦେଶ ନୁହେଁ ବରଂ ଅନ୍ୟ ରାଜ୍ୟରୁ ମାଛ ଆମଦାନୀ ଉପରେ ଆସାମ ସରକାର ୧୦ ଦିନ ପାଇଁ କଟକଣା ଜାରି କରିଛନ୍ତି  । ଆସାମ ସରକାରଙ୍କ ପଦକ୍ଷେପର ପ୍ରଭାବ ଓଡ଼ିଶା ଉପରେ ମଧ୍ୟ ପଡ଼ିଛି  । ଓଡ଼ିଶାରେ ଆନ୍ଧ୍ର ମାଛ ବ୍ୟାପକ ଭାବେ ବିକ୍ରି ହେଉଥିବାରୁ ଏହି ମାଛ ପରୀକ୍ଷା କରାଯିବ ବୋଲି ରାଜ୍ୟ ସରକାରଙ୍କ ପକ୍ଷରୁ କୁହାଯାଇଛି  ।

ଗତ ଜୁନ ୨୯ରେ ଆସାମ ସରକାର ବିଭିନ୍ନ ରାଜ୍ୟରୁ ଆସୁଥିବା ମାଛର ପରୀକ୍ଷା କରିଥିଲେ  । ତେବେ ଲାବୋରୋଟୋରୀରେ ପରୀକ୍ଷା ପରେ ସେଥିରେ ଫର୍ମାଲିନ ଥିବା ଜାଣିବାକୁ ମିଳିଥିଲା  । ତେଣୁ ୧୦ ଦିନ ପାଇଁ ମାଛ ଆମଦାନୀ ଉପରେ ଆସାମ ସରକାର କଟକଣା ଜାରି କରିଛନ୍ତି  । ପୁଣି ଥରେ ବାହାର ରାଜ୍ୟରୁ ଆସୁଥିବା ମାଛ ପରୀକ୍ଷା କରାଯିବ  । ଯଦି ଫର୍ମାଲିନ ନଥିବ ତେବେ ଯାଇ ଆମଦାନୀ ପାଇଁ ଅନୁମତି ପ୍ରଦାନ କରାଯିବ  । ମାଛଗୁଡ଼ିକୁ ସତେଜ ରଖିବା ପାଇଁ ଫର୍ମାଲିନର ବହୁଳ ଉପଯୋଗ କରାଯାଉଛି  । ଏହା ଉପରେ ମଧ୍ୟ ଆସାମ ସରକାର ରୋକ ଲାଗିଛନ୍ତି  । ଏମିତିକି ଫର୍ମାଲିନ ବ୍ୟବହାର କଲେ ଦୁଇରୁ ୭ ବର୍ଷ ପର୍ଯ୍ୟନ୍ତ ଜେଲ ଓ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନାରେ ଦଣ୍ଡିତ କରାଯିବ ବୋଲି ଚେତାବନୀ ଦିଆଯାଇଛି  ।

ଅପରପକ୍ଷରେ ଏଭଳି ରିପୋର୍ଟ ପ୍ରକାଶ ପାଇବା ପରେ ଓଡ଼ିଶା ସରକାର ମଧ୍ୟ ତପôରତା ପ୍ରକାଶ କରିଛନ୍ତି  । ଆନ୍ଧ୍ରପ୍ରଦେଶରୁ ରାଜ୍ୟକୁ ପ୍ରତିଦିନ ଶହ ଶହ ଟ୍ରକ ମାଛ ଆସୁଛି  । ତେଣୁ ସେହି ମାଛ ମଧ୍ୟ ପରୀକ୍ଷା କରାଯିବ ବୋଲି ମନ୍ତ୍ରୀ ପ୍ରଦୀପ ମହାରଥୀ କହିଛନ୍ତି  । ଓଡ଼ିଶାରେ ଏସଂକ୍ରାନ୍ତୀୟ ଅଭିଯୋଗ ଆସିନଥିଲେ ମଧ୍ୟ ମାଛ ପରୀକ୍ଷା କରାଯିବ  । ରିପୋର୍ଟ ମିଳିବା ପରେ କଡ଼ା ପଦକ୍ଷେପ ଗ୍ରହଣ କରାଯିବ ବୋଲି ମହାରଥୀ କହିଛନ୍ତି  । ସେହିପରି ଏନେଇ ଅନୁଧ୍ୟାନ କରାଯିବ ବୋଲି ମଧ୍ୟ ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା ପ୍ରକାଶ କରିଛନ୍ତି  । 

Tags : fish_ap