Odia Spot News | ଓଡିଆ ସ୍ପଟ୍ ନ୍ୟୁଜ୍
banner

ଆମ ଭାଷା ଆମ ସାହିତ୍ୟ

ମୁଖ୍ୟ ଖବର

    ବିଲ୍ ବୋର୍ଡର ଝିଅ

    Share on :
    Date: Jun 13, 2018    Views: 1593

    ଟ୍ରିଂ... ଟ୍ରିଂ... ଟ୍ରିଂ....... । “ତମେ ଷ୍ଟେସନ୍ରେ ପହଞ୍ଚିଲଣି । ମୁଁ ପାଞ୍ଚ ମିନିଟ୍ରେ ଓହ୍ଲେଇବି ।” ମୋବାଇଲ୍ର ଆର୍ ପଟେ ତମ ସ୍ୱର । ହଁ ମୁଁ ଷ୍ଟେସନ୍ରେ ଅଛି । ସେହି ବିଲ୍ ବୋର୍ଡ ସାମ୍ନାରେ...... ମୁଁ କହିଲି । “ସେହି ବିଲ୍ ବୋର୍ଡ...?” ତମର ପ୍ରଶ୍ନିଳ ବାକ୍ୟ । “ହଁ... ସେହି ଜୁଏଲରୀ ଦୋକାନର ବିଜ୍ଞାପନ ବିଲ୍ ବୋର୍ଡ ସୁନ୍ଦରୀ ଝିଅଟିର ନୀଳ ନୀଳ ନୟନ ଯୋଡାକୁ ଚାହିଁ... । କାହିଁକି କେଜାଣି... ସେହି ନୀଳ ନୟନାର ଚାହାଁଣୀ ମତେ କେବେ ଆଗକୁ ବଢିବାକୁ ଦେଇନି?” ତମକୁ ଚିଡାଇବା ପାଇଁ ମୁଁ କହିଲି । “ହଁ... ସେହି ଝିଅକୁ ବାହା ହେଇ ଯାଉନ! ମୋ ପଛରେ କାହିଁକି ପଡିଛ?” ତମର ଅଭିମାନ ଭରା ଅଭିଯୋଗ । ଫୋନ୍ କଟିଗଲା ।

    ...................................................

    ଆଜି ବି ଷ୍ଟେସନ୍ରେ ମୁଁ ସେହି ବିଲ୍ ବୋର୍ଡର ଝିଅଟିର ଚାହାଣୀରେ ବାନ୍ଧି ହୋଇ ରହିଛି । ତମ ଛୋଟ ସହରରୁ ଆସୁଥିବା ସେହି ପାସେଞ୍ଜର ଟ୍ରେନ୍ ଟି ଆଜି ବି ନିର୍ଦ୍ଧିଷ୍ଟ ସମୟରେ ଆସୁଛି । ହେଲେ ତମେ ସେଥିରୁ ଓହ୍ଲାଉ ନାହଁ କି...... ଫୋନ୍ରେ ଟ୍ରିଂ ଟ୍ରିଂ ଶୁଭୁନି । ଆଜି ତମେ ନିଜ ଜୀବନ ସାଥି ସହ କେଉଁ ଏକ ସୁଦୂର ସହରରେ!
    ...................................................

    ପୁରୀ- ଅହମଦାବାଦ ଟ୍ରେନ୍ ଷ୍ଟେସନରେ ପହଞ୍ଚିଲା କ୍ଷଣି ଦ୍ୱିତୀୟ ଶ୍ରେଣୀ ବଗିରୁ ଚାରି-ପାଞ୍ଚ ବର୍ଷର ଝିଅ ଟିଏ ମୋ ଦୃଷ୍ଟି ଆକର୍ଷଣ କଲା । ସେଇ ଚେହେରା...! ସେହି ଆଖି...! ସେହି ନାକ.....! ଠିକ୍ ତମ ପରି...... । ପଛେ ପଛେ ତମେ ଓ ଜଣେ ତରୁଣ...... ବୋଧ ହୁଏ ସେହି ତମ ସ୍ୱାମୀ! ଆଜି କାହିଁକି ସେହି ବିଲ୍ ବୋର୍ଡ ଝିଅର ଚାହାଣୀ ମତେ ବାନ୍ଧି ରଖି ପାରିଲାନି । ତମ ଆଡକୁ ପାଦ ବଢାଇଲି...... । ଦୁଇ ପାଦ ପରେ... ହଠାତ୍ ‘ବାହାଘର ପରେ ତମ ସହ ଦେଖା କରିବାକୁ ଚେଷ୍ଟା ନ କରିବାର ରାଣ’ ମତେ ପଛକୁ ଭିଡି ଧରିଲା । ମୁଁ ଅଟକି ଗଲି ।

    ଟିକେଟ୍... ଟିକେଟ୍ ... । ଟିଟିଇଙ୍କ ସ୍ୱରରେ ପ୍ରକୃତିସ୍ଥ ହୋଇ ତାଙ୍କୁ ଟିକେଟ୍ ଦେଖାଇ ପଛକୁ ଫେରି ଚାହିଁଲା ବେଳକୁ ତମେ ହଜି ସାରିଥିଲ ବିଶାଳ ଜନ ସମୁଦ୍ର ଭିତରେ । ଇତଃସ୍ତତ ହୋଇ ତମକୁ ଖୋଜିବା ଭିତରେ ମୋ ଲକ୍ଷ୍ୟ ସ୍ଥିର ହୋଇଯାଇଥିଲା ବିଲ୍ ବୋର୍ଡ ଝିଅର ସେହି ଚାହାଣୀ ପାଖରେ...... ।
    ...............................................................................

    ଉମାକାନ୍ତ ପାତ୍ର
    ଥାଲକୁଡି, ମଙ୍ଗଳପୁର, ଯାଜପୁର
    ୯୪୩୯୭୫୦୧୭୫

    Maximum 500 characters

    ଅଧିକ ମତାମତ

    Super right now

    Gudu

    Jun 13, 2018

    nice story...

    susant. p

    Jun 13, 2018

    ଆମ ଭାଷା ଆମ ସାହିତ୍ୟ View all

    Find Us on Facebook