Odia Spot News | ଓଡିଆ ସ୍ପଟ୍ ନ୍ୟୁଜ୍
BREAKING NEWS

Kanhu ଚରଣ ପଟ୍ଟନାୟକଙ୍କ ବିରୋଧରେ ସ୍ବାଧୀକାର ପ୍ରସ୍ତାବ ଆଣିଲେ ନରସିଂହ

2020 ମାର୍ଚ୍ଚ ମଧ୍ୟରେ ସବୁ ଗାଁକୁ ପାଇପ ଯୋଗେ ପାନୀୟ ଜଳ

ସୁରୁଖୁରରେ ଚାଲିଛି ବିଧାନସଭା

banner

?????????

ମୁଖ୍ୟ ଖବର

    ରଜ ପର୍ବ, ରଜୋ ମାନସିକତା

    Share on :
    ajab-Image
    Date: May 12, 2018    Views: 1926

    ରୁଦ୍ର ପ୍ରସନ୍ନ ରଥ

    ଆମ ଓଡିଶାରେ ଅତୀତରେ ରଜ ବେଶ୍ ଧୂମଧାମ୍ରେ ପାଳିତ ହେଉଥିଲା । ଏବେ ସେଥିରେ ସାମାନ୍ୟ ଭଟ୍ଟା ପଡିଯାଇଛି । ଅଧିକରୁ ଅଧିକ ଲୋକ କର୍ମସଂସ୍ଥାନ ପାଇଁ ସହର ଆଡକୁ ଆସୁଥିବାବେଳେ ଗାଁ ଗୁଡିକ ଶ୍ରୀହୀନ ହୋଇପଡୁଛି । ଶ୍ରୀହୀନ ହୋଇପଡୁଥିବା ଗାଁ ଗୁଡିକରେ ରଜ ପର୍ବ ଧିରେ ଧିରେ ମଳିନ ପଡିଆସିଲାଣି । ନା ଗାଁରୁ ରଜଦୋଳିର କଟମଟ ଶୁଭୁଛି ନା ଭାସି ଆସୁଛି ଚୂଲିମୁଣ୍ଡରୁ ପୋଡପିଠାର ବାସ୍ନା । ପୂର୍ବ ରାତିରେ ଅନିଦ୍ରା ରହି ସଜ ହେବାର ଇଛା ବି ଆଉ ଗାଁ କୁମାରୀ ର ନାହିଁ । ସେପଟେ ସହରରେ ତ ରଜ ଖୋଜିଲେ ମିଳୁନି । ସହରରେ ରଜ ଯାହା ସୀମିତ ଅଛି ସପିଂ ମଲର ବିଜ୍ଞାପନରେ । ରଜ ସମୟରେ ସପିଂ ମଲରେ ଭିଡ ଲାଗୁଛି ଡିସକାଉଣ୍ଟକୁ ନେଇ । ବ୍ରିକିବଟାର ଘୋଘାରେ ରଜ କେତେବେଳେ ଆସି କେତେବେଳେ ପଳାଉଛି ତାହା ଜାଣିବି ହେଉନି । ଏଥର ରଜ ଆସିବାକୁ ଅନେକ ଦିନ ବାକି ଥିଲେ ବି ରଜକୁ ନେଇ ସାରା ଓଡିଶାରେ ଚର୍ଚ୍ଚା ଆରମ୍ଭ ହୋଇଯାଇଛି । ବିଜ୍ଞାପନରେ ରଜକୁ  ଇଂରାଜୀରେ RAJA ପରିବର୍ତ୍ତେ  RAJO ଲେଖିବାକୁ ନେଇ ବିରୋଧ ଆରମ୍ଭ ହୋଇଛି । ସମାଜିକ ଗଣମାଧ୍ୟମରେ #ରଜୋନୁହେଁରଜ ନାମକ ଅଭିଯାନ ବେଶ୍ ଯୋରସୋରରେ ଚାଲିଛି ।

    ଓଡିଶାର ବିଭିନ୍ନ ପର୍ବପର୍ବାଣୀକୁ ବିକୃତ କରି ଲେଖାଯିବା କିମ୍ବା ବିକୃତ କରି ଉଚ୍ଚାରଣ କରିବା କିଛି ନୂଆକଥା ନୁହେଁ । ଏହା ବିଗତ କେତେବର୍ଷଧରି ନିୟମିତ ଚାଲିଆସୁଥିଲା । ଏହାକୁ କାଁଭାଁ ବିରୋଧ ବି କରାଯାଉଥିଲା । ସାଧାରଣତଃ ଓଡିଆମାନେ ଶାନ୍ତିପି୍ରୟ ହୋଇଥିବାରୁ ସେମାନେ କଳିଗୋଳ, ତର୍କ ବିବାଦରେ ପଶିବାକୁ ଚାହାନ୍ତି ନାହିଁ  । ଏମିତି ଦେଖିବାକୁ ଗଲେ ଜଣେ ସାଧାରଣ ଓଡିଆର ଆବଶ୍ୟକତା ବେଶ୍ କମ୍ । ଆବଶ୍ୟକତା ନ ପଡିଲେ ସେମାନେ ବାହାରକୁ ଯିବାକୁ ପସନ୍ଦ କରନ୍ତି ନାହିଁ । ବରଂ ନିଜର ଛୋଟକାଟର ଆବଶ୍ୟକତା ପୂରଣ ହୋଇଗଲେ ସେମାନେ ନିଜଘରେ ରହି ସମୟ କାଟିବାକୁ ଭଲ ପାଆନ୍ତି । ଏପରି ସ୍ଥଳେ ଭାଷା କିମ୍ବା ଜାତିକୁ ନେଇ ସାମଗ୍ରିକ ଭାବେ ବିରୋଧ କରିବା କାହିଁ କେତେ ଯୁଗରୁ ଦେଖାଯାଇ ନାହିଁ । ଏଣୁ ରଜକୁ ରଜୋ ଲେଖିବାରେ କିମ୍ବା ପୂଜା କୁ କେହି ପୂଜୋ ଲେଖିଦେଲେ ତାହା ଅନେକଙ୍କୁ କଷ୍ଟ ଦିଏ ନାହିଁ । ବରଂ କିଏ କ’ଣ ଲେଖିଲେ ମୋର କ’ଣ ଗଲା ନ୍ୟାୟରେ ଏହି ପରି ଭାଷାରେ ତୃଟି ଆଉ ବନାନଗତ ଅଶୁଦ୍ଧି ଓଡିଆର କ୍ରମଶଃ ଅସ୍ଥିମଜ୍ଜାଗତ ହୋଇଯାଉଥିଲା । ସବୁଦେଖୁଥିଲେ ବି ଏହାକୁ କେହି ପ୍ରତିବାଦକରୁନଥିଲେ । ପ୍ରତିବାଦ କରିବାରେ ମୁଖଲାଜ ପ୍ରତିବନ୍ଧକ ସାଜୁଥିଲା । ସାମାଜିକ ଗଣମାଧ୍ୟମରେ ବି ଲୋକ କ୍ରମଶଃ ରଜକୁ ରଜୋ ବୋଲି ଗ୍ରହଣ କରିନେଇଥିଲେ । ରଜ କେମିତି ରଜୋ ହେଲା, କାହିଁକି ରଜୋ ହେଲା ଏହାର ଉତ୍ତର କାହାପାଖରେ ନଥିଲା । କେହି ଉତ୍ତର ଖୋଜିବାକୁ ଚେଷ୍ଟା ବି କରୁନଥିଲେ । ବରଂ ସୁଅରେ ଭାସିଗଲାପରି ଦେଖା ଶିଖା ଓଡିଆର ଉପପାଦ୍ୟକୁ କେବଳ ପ୍ରମାଣ କରିଚାଲିିଥିଲେ ଯାହା । ଓଡିଆଙ୍କ ସହ୍ୟଶକ୍ତିର ବ୍ୟାପକ ପରୀକ୍ଷା ଚାଲିଥିଲା । ଭାଷା ବଂଚାଅ ଅଭିଯାନ ସବୁ ଭାଷଣରେ ସୀମିତ ରହିଥିଲା ନହେଲେ ବୁଦ୍ଧିଜୀବିଙ୍କର ବିଳାସବ୍ୟସନର ବିଷୟ ବସ୍ତୁ ପାଲଟି ଯାଇଥିଲା ଯେମିତି । ସାଧାରଣ ଲୋକ ଭାଷାକୁ ନେଇ ବ୍ୟସ୍ତ ହେଉଥିଲେ ବି ଏହାର ପ୍ରତିବାଦ କିପରି କରିିବ ତାହା ବାଟ ପାଉନଥିଲା । ବରଂ ସବୁ କିଛି ତା ଆଖି ଆଗରେ ଘଟୁଥିଲେ ବି କିଛି ଗୋଟିଏ କରିନପାରିବାର ଅଶ୍ୱସ୍ତିବୋଧ ତାଙ୍କୁ ମାଡି ବସୁଥିଲା ଯେପରି । 

    ମାତ୍ର ଚଳିତ ଥରର #ରଜୋନୁହେଁରଜ ଅଭିଯାନରେ ଅନେକ ବିଶେଷତା ଅଛି । ୧୨ ମେରୁ ରୂପାଲୀଛକର କଳାମନ୍ଦିର ର ହୋର୍ଡିଂ ଆଗରେ ଏ ଲେଖକର ନୀରବ ପ୍ରତିବାଦ ପରେ ପରେ ଇଂଣ୍ଟରନେଟ୍ରେ ଏସବୁ ଘଟଣା ବ୍ୟାପକରୂପେ ଭାଇରାଲ ହୋଇଯାଇଛି । ଏ ସଂକ୍ରାନ୍ତୀୟ ମୂଳ ପୋଷ୍ଟକୁ ପାଖାପାଖି ୩୦୦ ଥର ସେୟାର କରାଯାଇଥିବା ବେଳେ ଏ ସଂକ୍ରାନ୍ତୀୟ ବିଭିନ୍ନ ପୋଷ୍ଟକୁ ୧୦୦୦ରୁ ଅଧିକ ଲାଇକ୍, ସେୟାର ଏବଂ ମତାମତ ମିଳିଛି । ପୁଣି ଏ ପରି ଅଭିଯାନ ସହ ଦିନକୁ ଦିନ ନୂଆ ନୂଆ ଲୋକ ଯୋଡି ହେଉଛନ୍ତି । ଉକ୍ରଳ ବିଶ୍ୱବିଦ୍ୟାଳୟ ଛାତ୍ର ସଂସଦର ପୂର୍ବତନ ସଭାପତି ଦେବୀ ରାୟ, ଦୃଷ୍ଟିବାଧିତ କ୍ରିକେଟର ଜାଫର ଇକବାଲ, ଉତ୍ତର ପ୍ରଦେଶରେ କାମ କରୁଥବା ଓଡିଆ ପରାମର୍ଶଦାତା ଡ. ବ୍ୟୋମକେଶ୍ , ସମାଜସେବୀ ଉମାକାନ୍ତ ପାତ୍ର ଆଦି ଅନେକ ନିଜେ ଏହି ଆନେ୍ଦାଳନରେ ପ୍ରତ୍ୟେକ୍ଷରୂପେ ଭାଗନେଇ ଏହାକୁ ଆଗକୁ ନେବାକୁ ବାହାରିଛନ୍ତି । ସେମାନଙ୍କୁ ଯୋଗୁଁ ଏ ଅଭିଯାନ ଧିରେ ଧିରେ ବ୍ୟାପକ ହେବାକୁ ଯାଉଛି । ଏ ପରିସ୍ଥିତିରେ ଏହା ଆଗକୁ ସାମାଜିକ ଗଣମାଧ୍ୟମରେ ସର୍ବାଧିକ ବ୍ୟାପକ ଅଣରାଜନୈତିକ ଗଣଅନେ୍ଦାଳନର ରୂପ ନେବାକୁ ଯାଉଛି । ପୁଣି ଏଥିରେ ସମାଜର ବିଭିନ୍ନ ବର୍ଗର ଲୋକ ନିଜ ଇଚ୍ଛାରେ ସାମିଲ ହୋଇଛନ୍ତି । ଛାପା  ଏବଂ ବୈଦୁତିକ ଗଣମାଧ୍ୟମର ସମର୍ଥନ ମଧ୍ୟ ଏହା ପ୍ରତି ଧିରେ ଧିରେ ବଢିଚାଲୁଛି । ଏହି #ରଜୋନୁହେଁରଜ ଅଭିଯାନ ଆରମ୍ଭ ହେବାର ମାତ୍ର କିଛି ଦିନ ମଧ୍ୟରେ ଏହା ଲକ୍ଷାଧିକ ଲୋକଙ୍କ ପାଖରେ ପହଁଚିଛି । ଏବଂ ସମାଜର ବିଭିନ୍ନ ବର୍ଗର ଲୋକ ଏହା ପ୍ରତି ନିଜର ଆସ୍ଥା ପ୍ରକଟ କରିଛନ୍ତି ।

    ସବୁଥର ଭଳି ଏହି ଆନେ୍ଦାଳନର ଆରମ୍ଭ ହୋଇଛି ଜଣଙ୍କ ଠାରୁ । ମାତ୍ର ପ୍ରତିବାଦର ସ୍ୱର ବେଶ୍ ତୀବ୍ର ହୋଇଚାଲିଛି । ଅନେକ ଓଡିଆ ଯେଉଁମାନେ ଏପରି ବିକୃତୀକରଣକୁ ବିରୋଧ କରୁଥିଲେ ବି ନିଜର ମତାମତ ଜଣାଇବାକୁ ବାଟ ପାଉନଥିଲେ ସେମାନେ ସତେ ଯେମିତି ଗୋଟିଏ ରାସ୍ତା ପାଇଛନ୍ତି । ସେମାନଙ୍କ ମତାମତରୁ ଜଣାପଡୁଛି ଯେ ସେମାନେ ସହରରେ ସୁଯୋଗ ଅଭାବରୁ ହୁଏତ ରଜ ପାଳିନପାରନ୍ତି ମାତ୍ର ରଜୋକୁ କଦାପି ମାନସିକ ସ୍ତରରେ ରଜର ପ୍ରତିଶବ୍ଦ ବୋଲି ଗ୍ରହଣ କରିପାରିବେ ନାହିଁ । ପୁଣି ପ୍ରତିବାଦ କରିବା ପାଇଁ ଯେ ରାସ୍ତାକୁ ଓହ୍ଲାଇ ରାସ୍ତା ରୋକ କରିବା ଦରକାର, ବନ୍ଦ ପାଳନ କରିବା ବା ହିଂସାକାଣ୍ଡ କରିବା ଦରକାର ତାହା କୁ ଭୁଲ୍ ବୋଲି ପ୍ରମାଣିତ କରିଛନ୍ତି ଏହି ଅଭିଯାନର ଭାଗ ନେଉଥିବା ଲୋକମାନେ । ଚୁପ ରହି ଫଟୋ ଉଠାଇ, ନୀରବରେ କିଛି ଶବ୍ଦ ମାଧ୍ୟମରେ ବି ଜବରଦସ୍ତ ପ୍ରତିବାଦ କରାଯାଇପାରେ ତାହା ପ୍ରମାଣିତ କରାଯାଇଛି । ସାଧାରଣ ଜାଗାରେ ସାଧାରଣ ପୋଷାକରେ ସାଧାରଣଭାବରେ ଅସାଧାରଣଭାବେ ଅତୀବ ତୀବ୍ର ବିରୋଧର ଏ ଯେଉଁ ଅୟମାରମ୍ଭ ହୋଇଛି ତାହା ସତରେ ଓଡିଶାର ସାମାଜିକ ଗଣମାଧ୍ୟମ ଇତିହାସରେ ବିରଳ ଦୃଷ୍ଟାନ୍ତ ହୋଇ ଠିଆ ହୋଇଛି ।

    ବ୍ୟବସାୟିକ ପ୍ରତିଷ୍ଠାନ ଓଡିଆଙ୍କର ଶତ୍ରୁ ନୁହନ୍ତି । ବରଂ ଓଡିଆମାନେ କାହିଁ କେଉଁ ଆଦିମ କାଳରୁ ସେମାନଙ୍କ ସହିତ ଏକ ମିତ୍ରତା ସୂତ୍ରରେ ବାନ୍ଧି ହୋଇ ଆସିଛନ୍ତି । ମାତ୍ର ଓଡିଆଙ୍କ ଭାଷାକୁ ବିକୃତ କରୁଥିବା ରଜୋ ମାନସିକତା ହିଁ ଆମର ଓଡିଆଙ୍କ ଶତ୍ରୁ । ମାତୃଭାଷାକୁ ଅପଭ୍ରଂଶ କରି ବିକୃତ କରି ଲେଖୁଥିବା ପ୍ରତ୍ୟେକ ବ୍ୟକ୍ତି ଏହି ଅଭିଯାନରୁ ଶିକ୍ଷା ଗ୍ରହଣ କରିଥିବେ ବୋଲି ଆଶା କରାଯାଉଛି । କାନ୍ଥରୁ ପ୍ରାଚୀରପତ୍ର ହଟାଇବା କିମ୍ବା ହୋର୍ଡିଂ ଉଠାଇବାଠୁ ବରଂ ମନ ଭିତରେ ଥିବା ରଜୋ ମାନସିକତା ହଟାଇବା ବେଶୀ ଆବଶ୍ୟକ । ତେଣୁ ଏ ଅଭିଯାନର ଗହଣୀୟତା ସହଜରେ ବଢି ଚାଲିଛି । ଏହି ଅଭିଯାନ ଯଦି ସଫଳ ହୁଏ ତେବେ ଆଗାମୀ ଦିନରେ ବିଜ୍ଞାପନରେ ହେଉଥିବା ଓଡିଆଭାଷାର ବିକୃତକରଣ ରୋକିବାପାଇଁ ବାଟ ଖୋଲିଯିବ ବୋଲି ଆଶାକରାଯାଊଛି ।

    ଧବଳଗିରି, ଯାଜପୁର ରୋଡ
    ୭୯୭୮୬୭୧୭୭୬

     

    Maximum 500 characters

    ????????? View all

    Find Us on Facebook